Zııandy óndiriste jumys isteıtinderge 208 myń teńgege deıin tólenedi
QR Eńbek jáne halyqty áleýmettik qorǵaý mınıstri Svetlana Jaqypova zııandy eńbek jaǵdaılarynda jumys isteıtin azamattarǵa arnaıy áleýmettik tólem qalaı taǵaıyndalatynyn túsindirdi, dep habarlaıdy Kazinform.
Mınıstrdiń aıtýynsha, Memleket basshysy Qazaqstan halqyna Joldaýynda zııandy eńbek jaǵdaılarynda uzaq ýaqyt jumys istep júrgen azamattarǵa 55 jastan bastap arnaýly áleýmettik tólem engizý boıynsha tapsyrma berdi. Osy tapsyrmany oryndaý maqsatynda Eńbek jáne halyqty áleýmettik qorǵaý mınıstrligi Qarjy naryǵyn retteý jáne damytý agenttigi sekildi múddeli memlekettik organdardyń qatysýymen tıisti zańnamalyq ózgerister ázirlendi.
«Zańnamany Senat maquldady, ol Prezıdenttiń qol qoıýyna joldanaıyn dep otyr. Zań jobasynda kóp ózgerister engiziledi. Birinshiden, arnaıy áleýmettik tólem kóp jyldar boıy jumys istegen, 55 jasqa tolǵan jáne 7 jyl boıy ózderine jıyntyq jarnalar aýdarǵan azamattarǵa tólenedi. Arnaıy áleýmettik tólem tórt qarajat kózinen: respýblıkalyq bıýdjetten 2 eń tómen kúnkóris deńgeıi mólsherinde; ómirdi saqtandyrý jónindegi kompanııalardan; jumys berýshilerdiń qarajatynan, BJZQ-dan mindetti kásiptik zeınetaqy jarnalary esebinen tólenedi», - dedi QR eńbek jáne halyqty áleýmettik qorǵaý mınıstri Svetlana Jaqypova Ortalyq kommýnıkatsııalar qyzmetinde.
Tólemderdiń ortasha mólsheri 208 myńǵa jetedi jáne 63 jasqa deıin tólenedi. Árbir jumysker úshin tólem mólsheri BJZQ-daǵy jınaqtaryna baılanysty bolady.
Arnaıy áleýmettik tólemderdi alý úshin eńbek jaǵdaılary zııandy jumystan – demalysqa nemese jeńilirek jumysqa aýysýy kerek. 2024 jyly arnaıy áleýmettik tólemge 37 myńnan astam jumysker, 2030 jyly – 58 myńnan astam, 2035 jyly – 95 myńnan astam jumysker úmitker bola alady.
