Zııandy eńbek jaǵdaılarynda jumys isteıtinderge arnaıy áleýmettik tólem jasalady
Búgin Májiliste Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov depýtattarǵa zııandy eńbek jaǵdaılarynda uzaq ýaqyt boıy jumys isteıtin azamattarǵa 55 jastan bastap zeınetkerlik jasqa tolǵanǵa deıin arnaıy áleýmettik tólem engizýdi eskeretin zańnamaǵa túzetýlerdi tanystyrdy, dep habarlaıdy Kazinform.
A. Sarbasovtyń sózine qaraǵanda, Memleket basshysy 2023 jylǵy 1 qyrkúıektegi Qazaqstan halqyna Joldaýynda aıtqan tapsyrmany oryndaý maqsatynda tıisti usynystar engizildi. Bul turǵyda Eńbek jáne halyqty áleýmettik qorǵaý mınıstrligi zııandy eńbek jaǵdaılarynda jumys isteıtin adamdardy áleýmettik qorǵaý deńgeıin arttyrýdy kózdeıtin zańnamaǵa túzetýler ázirlep, ony múddeli memlekettik organdarmen kelisip, Májilistiń qaraýyna jiberdi.
«Zańnamalyq túzetýlerdiń negizgi maqsaty - zııandy eńbek jaǵdaılarynda jumys isteıtin jumyskerlerge arnaıy áleýmettik tólem engizý, jumyskerdiń eńbek mindetterin oryndaý kezinde jazataıym oqıǵalardan mindetti áleýmettik saqtandyrý júıesin jetildirý», – dedi vıtse-mınıstr.
Onyń aıtýynsha, osy sharalardy iske asyrý úshin Azamattyq, Eńbek, Áleýmettik kodeksterge jáne «Qyzmetkerdi eńbek (qyzmettik) mindetterin atqarý kezinde jazataıym oqıǵalardan mindetti saqtandyrý týraly» zańǵa túzetýler engizý qarastyrylǵan.
A. Sarbasov 2014 jyldan bastap zııandy eńbek jaǵdaılarynda jumys isteıtin adamdar úshin jumys berýshiler esebinen jalaqynyń 5% mólsherinde mindetti kásiptik zeınetaqy jarnalary tólenetinin habarlady. Sondaı-aq olarǵa zeınetaqy jınaqtary jetkilikti bolǵan kezde zeınetke erte shyǵý quqyǵy beriledi: erler úshin – 5,3 mln teńge, áıelder úshin - 6,8 mln teńge.
Arnaıy áleýmettik tólem birneshe komponentten turady jáne tórt baǵytty qamtıdy. Birinshiden, respýblıkalyq bıýdjetten 1,5 eń tómen kúnkóris deńgeıi mólsherinde arnaıy kásiptik tólem bar. Ekinshiden, BJZQ-dan mindetti kásiptik zeınetaqy jarnalary men jınaqtalǵan zeınetaqy jınaqtaryn eskere otyryp, mindetti zeınetaqy jarnalary esebinen de iske asyrylady. Úshinshiden, ómirdi saqtandyrý jónindegi kompanııalardan 1 eń tómen kúnkóris deńgeıi mólsherinde eskeriledi. Tórtinshiden, jumys berýshilerdiń qarajaty esebinen 1 eń tómen kúnkóris mólsherinde júzege asyrylady.
Aqmádı Sarbasov arnaıy áleýmettik tólemderdi engizý memlekettiń, jumys berýshiniń jáne jumyskerdiń ortaq jaýapkershiligin qamtamasyz etetinin jáne zııandy eńbek jaǵdaılarynda jumys isteıtin adamdardyń áleýmettik qorǵalý deńgeıin arttyrýǵa múmkindik beretinin atap ótti.
Eske salsaq, Memleket basshysy bıylǵy Joldaýynda zııandy eńbek jaǵdaıynda jumys istep júrgen qazaqstandyqtardy 55-jastan bastap arnaýly áleýmettik tólemdi engizý boıynsha Úkimetke tapsyrma bergen edi.
