Zııandy eńbek jaǵdaıynda jumys isteıtin 8,7 myń adamǵa áleýmettik tólem jasaldy
ASTANA. KAZINFORM – Jyl basynan beri zııandy eńbek jaǵdaıynda jumys isteıtin 8,7 myńnan astam qyzmetkerge saqtandyrý uıymdarynan 2 mlrd teńgege jýyq arnaıy áleýmettik tólemder tólendi. Bul týraly QR Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva aıtyp berdi.
Spıkerdiń sózinshe, ómirdi saqtandyrý salasy azamattarymyzdyń erekshe sanattaryn saqtandyrý arqyly qorǵaýdy qamtamasyz etý jóninde mańyzdy áleýmettik fýnktsııany oryndaıdy.
«Memleket basshysynyń tapsyrmasyn iske asyrý úshin 2023 jylǵy jeltoqsanda zań qabyldandy, onda saqtandyrý uıymdary esebinen zııandy eńbek jaǵdaılarynda jumys isteıtin 55 jasqa tolǵan qyzmetkerlerge jańa áleýmettik tólemderdi júzege asyrý kózdelgen. Tólemder qyzmetkerdi jazataıym oqıǵalardan mindetti saqtandyrý arqyly júzege asyrylady», - dedi ol Ortalyq kommýnıkatsııalar qyzmetinde ótken brıfıngide.
Bıylǵy jyldyń 9 aıynda 8,7 myńnan astam qyzmetkerge saqtandyrý uıymdarynan 2 mlrd teńgege jýyq arnaıy áleýmettik tólemder tólendi. Oǵan qosymsha bolashaq tólemder úshin 19,7 mlrd teńgege rezervter qalyptastyryldy.
Bul tólemderden basqa 2024 jylǵy 1 qańtardan bastap, jazataıym oqıǵalardan mindetti saqtandyrý sheńberinde aldyn alý jáne ońaltý sharalaryna tólemder engizildi.
«Aldyn alý sharalaryna arnalǵan tólemder jumys berýshilerge eńbek qaýipsizdigin arttyrý úshin júzege asyrylady, al ońaltý sharalaryna tólemder zardap shekken qyzmetkerdiń densaýlyǵyn qalpyna keltirýge jumsalatyn shyǵyndardy óteýge arnalǵan. Atalǵan sharalar óndiriste zardap shekken jáne zııandy eńbek jaǵdaılarynda jumys isteıtin qyzmetkerlerdi áleýmettik qorǵaýdy kúsheıtýge baǵyttalǵan», - dedi M. Hadjıeva.
Aıta keteıik, tólem zeınetkerlik jasqa tolǵansha ǵana tólenedi. Óıtkeni zeınetaqy taǵaıyndalǵannan keıin olar toqtatylady.