Zııaly qaýym ókilderi: Qazaqstan mádenıeti damyǵan órkenıetti elge aınaldy
«Qazaqstan Respýblıkasynyń Prezıdenti ókilettigin toqtatýyńyz týraly búgingi Sizdiń úndeýińizdi qazaqstandyqtar, onyń ishinde qazaq óneriniń qara shańyraǵy M.Áýezov atyndaǵy Qazaq memlekettik akademııalyq drama teatrynyń ujymy da tolqı, erekshe tebirenispen qabyldady. Sizge Táýelsiz eldiń alǵashqy basshysy bolý mártebesi buıyrdy. Ózińiz júrgizgen memlekettik sarabdal saıasatyńyzdyń arqasynda Qazaqstan shyn mánisindegi táýelsiz de erkin, ekonomıkasy men mádenıeti damyǵan órkenıetti elge aınaldy, álem qaýymdastyǵynan laıyqty oryn aldy», - delingen zııaly qaýym ókilderiniń birlesken málimdemesinde.
Mádenıet salasyndaǵy memlekettik saıasatyńyz - mádenı jáne rýhanı qundylyqtardy jasaýǵa, jańǵyrtýǵa, qaıta túletýge, saqtaýǵa, damytýǵa, taratýǵa jáne paıdalanýǵa baǵyttalǵanyn maqtanyshpen aıtýymyzǵa bolady. Táýelsizdik jyldary ulttyq óner, sahna óneri qulashyn keńge jaıdy. Ózińizdiń bastamańyzben Respýblıkada táýelsizdik jyldary kóptegen jańa teatrlar ashyldy, talantty birneshe jas býyn ósip shyqty.
Pikir bildirgenderdiń arasynda KSRO Halyq ártisi Asanáli Áshimov, M.Áýezov atyndaǵy Qazaq memlekettik akademııalyq drama teatrynyń dırektory Sábıt Ábdihalyqov basaǵan bir top mádenıet qaıratkerleri bar.
Sondaı-aq, Qazaq ulttyq óner ýnıversıtetiniń rektory Aıman Musaqojaeva Prezıdenttiń úndeýine pikir bildirdi.
«Nursultan Ábishuly Nazarbaev álemniń qazirgi tarıhyndaǵy kemeńger tulǵa. Baıtaq elimiz, tuńǵysh Prezıdentimizdiń basshylyǵymen álem moıyndaǵan, jahanǵa aty jetken memleketke aınaldy. Sonymen qatar, elimizdiń ekonomıkasyn jaqsartyp, halqymyzdyń ál aýqatyn kóterdi», - deıdi ol.