Zııaly qaýym ókilderi «100 jańa oqýlyq» jobasyn talqylaýda
Basqosýǵa oblystyq assambleıa keńesiniń músheleri, ǵalymdar, zııaly qaýym ókilderi, etnomádenı birlestikterdiń tóraǵalary, assambleıa janyndaǵy Qoǵamdyq kelisim keńesi men «Dostyq» klýbtarynyń músheleri qatysty.
Іs-sharada Aımaqtyq áleýmettik-ınnovatsııalyq ýnıversıteti «Qazaqstan halqy Assambleıasy» kafedrasynyń meńgerýshisi Úsen Asqarov «Rýhanı jańǵyrý» baǵdarlamasy aıasyndaǵy «Jańa gýmanıtarlyq bilim. Qazaq tilindegi 100 jańa oqýlyq» jobasynyń mańyzyna toqtaldy. Joba boıynsha álemdik ádebıettiń jaýhary sanalatyn 18 oqýlyqtyń tuńǵysh ret qazaq tiline aýdarylýy baǵa jetpes qazyna ekendigin jetkizdi.
«Bul kitaptar qoǵamdaǵy azamattyq ustanym, moraldyq qundylyq, ar-ujdan negizderin qalaıdy. Adamnyń ózine, aınalasyna, elge degen kózqarasyn qalyptastyrady. Joǵary oqý oryndaryndaǵy stýdentterdiń 70 paıyzy qazaq tilinde oqıtynyn eskersek, álemniń gýmanıtarlyq saladaǵy injý-marjandary qazaq tilinde sóıleýi rýhanı jańǵyrýymyzǵa yqpal etedi», - dedi Úsen Faızýllauly.
Alqaly jıyn oblystyq Qazaqstan halqy Assambleıasy keńesi men qoǵamdyq kelisim keńesiniń birlesken otyrysyna ulasty. Onda oblystyq bilim, qurylys basqarmalary men QR Ulttyq Banki OQO fılıalynyń, «Ońtústik» aımaqtyqtyq ınvestıtsııalyq ortalyǵy» basqarmasy basshylarynyń Prezıdent usynǵan bes áleýmettik bastamasynyń óńirde iske asý barysy jaıly esepteri tyńdaldy. Sondaı-aq, basqosýda 24 azamatqa Elbasynyń qoly qoıylǵan Qazaqstan halqy Assambleıasy Keńesiniń múshesi týraly kýálik tapsyryldy.
