Zııaly qaýym mýzeı men kitaphanalardy jádigerlermen toltyrýlary tıis - B.Saparbaev

ASTANA. QazAqparat - QR Premer-Mınıstriniń orynbasary Berdibek Saparbaev zııaly qaýym ókilderin jáne barsha qazaqstandyqtardy mýzeı men kitaphanalardyń qoryn toltyrýǵa shaqyrdy.

Onyń sózine qaraǵanda, «Mádenı mura» baǵdarlamasy aıasynda jańadan ashylǵan Qazaqstannyń ulttyq mýzeıin qundy jádigerlermen toltyrýǵa múmkin bolǵan.

«Bizdiń mindet - árbir qazaqstandyqtyń osy mýzeıdiń damýyna óz úlesin qosýǵa qol jetkizý. Bul mýzeı - bizdiń maqtanyshymyz. Jaqynda ǵana mýzeı basshysy Darhan Myńbaıdyń bastamasymen jádigerlerdi jınaý boıynsha arnaıy aktsııa uıymdastyrdyq. Osy sharanyń aıasynda kórnekti mádenıet, óner, ǵylym qaıratkerlerinen, jazýshylardan, saıasatkerler men sportshylardan 400-den astam jádiger jınaldy. Osy dástúrdi bizdiń oblystar da ilip ákete alady», - dedi ol Mádenıet jáne sport mınıstrliginiń bastamasymen ótip jatqan «Máńgilik el - eldiń biriktirýshi kúshi» atty forým barysynda.

Onyń aıtýynsha, Ult kóshbasshysynyń kitaphanasyna Myrzataı Joldasbekov jeke qorynda jatqan birqatar kitaptaryn ótkizgen.

«Barlyq oblystarda osyndaı tanymal adamdar óz qoryndaǵy kitaptar men jádigerlerdi ótkize alady. Bul bolashaq jastardy tárbıeleýge de úlken serpin berer edi», - dep atap ótti B.Saparbaev.

Aıta keteıik, «Máńgilik el - eldiń biriktirýshi kúshi» atty Qazaqstannyń shyǵarmashylyq zııaly qaýymy forýmyna respýblıkanyń túkpir-túkpirinen 200-ge jýyq zııaly qaýym ókili keldi. Olardyń ishinde kórnekti mádenıet, óner, ǵylym, qaıratkerleri, jazýshylar, mádenıet, shyǵarmashylyq jáne bilim uıymdarynyń basshylary qatysty.