Zıratty tonaý jaǵdaıy jıilep ketti - senator
ASTANA. QazAqparat - QR Parlamenti Senatynyń depýtaty Sergeı Plotnıkov zıratty tonaý jaǵdaıy jıilep ketkenin aıtyp, Premer-mınıstrdiń atyna depýtattyq saýal joldady, dep habarlaıdy QazAqparat tilshisi.
«Meniń depýtattyq saýal joldaýyma kommýnaldyq jáne turǵyn úılerdiń qajettiligindegi metall zattardy urlaý jaǵdaıy jıilep ketkeni týraly shaǵymdar sebep bolyp otyr. Naqtyraq aıtqanda, qaskóıler káriz sýlarynyń lıýktaryn, múgedekterge arnalǵan pandýstardy, esikterdi urlap ketip jatady. Bul kommýnaldyq kásiporyndardyń jumysyna aıtarlyqtaı zııanyn tıgizip, adamdardyń amandyǵyna qaýip tóndiredi. Sonymen birge beıitterdegi vandalızmniń kóbeıip bara jatqany áleýmettik qysymdy odan ary arttyrady. Zırattardaǵy shoıyn jáne temir qorshaýlar urlanyp, eskertkishter, qulpytastar qıratylýda», - deıdi Sergeı Plotnıkov.
Onyń aıtýynsha, temir qabyldaıtyn oryndar men fırmalardan biliktilik talaptary men lıtsenzııalary alynyp tastalǵannan keıin urlyq tipti jıilep ketken. Senator óz sózinde baqylaý jáne qadaǵalaýdy alyp tastar aldynda qarapaıym azamattardyń da múddesin oılaý kerektigin atap ótti.
«Týyndaǵan jaǵdaıdy esepke ala otyryp, temir jáne tústi metaldardy qabyldaýmen aınalysatyn kásipkerlik sýbektileriniń jumysyn túzetý boıynsha keshendi sharalardy qabyldaýdy suraımyn», - dedi Plotnıkov.
Foto: minbar.kz
