«Zırattaǵy bos oryndy brondaý»: Almatyda jerleýdiń elektrondyq bazasy ázirlenedi

ALMATY. KAZINFORM – Almaty qalasynyń Tsıfrlandyrý basqarmasy jerleýdiń elektrondyq bazasyn iske qosýdy josparlap otyr. 

Memlekettik satyp alý saıtynda «Jerleýdiń elektrondyq bazasy» tsıfrlyq platformasyn qurý qyzmeti boıynsha habarlandyrý jarııalanǵan. 

Qazirgi ýaqytta ashyq konkýrs júrip jatyr, ol 13 maýsym kúni aıaqtalady. Joba quny – 223 mln (223 214 285). Tapsyrys berýshi – Almaty qalasynyń Tsıfrlandyrý basqarmasy. Habarlandyrýda tsıfrlyq platforma jerleý oryndary týraly aqparatty júıeleý jáne tsıfrlandyrý maqsatynda qurylatyny aıtylǵan.

Jobanyń tehnıkalyq sıpattamasyna sáıkes, «Jerleýdiń elektrondyq bazasy» tsıfrlyq platformasy – bul jerleý rásimderine baılanysty barlyq taraptyń (qyzmet alýshylar, jerleý qyzmetin uıymdastyrýshylar, zırat ákimshiligi jáne jergilikti atqarýshy organdar) arasyndaǵy tıimdi ózara is-qımyldy qamtamasyz etetin jáne adamdarǵa jerleý rásimderi qoljetimdi bolatyn biryńǵaı qural bolýy tıis. 

Odan bólek bul platforma arqyly adamdar qaıtys bolǵandardyń jerlengen jeri týraly aqparatty tipti ol basqa aımaqta bolsa da, ońaı taba alady. Sonymen qatar platforma ardagerler, tanymal tulǵalar, mádenı mura týraly málimetterdi qosa alǵanda, jerleý týraly derekterdi saqtaýǵa yqpal etedi. Jobanyń tehnıkalyq sıpattamasynda elektrondy baza zırattardy basqarýdy jeńildetini jáne jerleýmen aınalysatyn qyzmetterdiń jumysyn baqylaýǵa kómektesetini aıtylǵan.

Jerleýdiń elektrondyq bazasyn ázirleýde qoıylatyn talaptardyń qatarynda – brondaý qyzmetin qosý bar. Ol boıynsha platforma qoldanýshylary zırat kartasynda bos oryndy tańdap, brondaý úshin ótinish jibere alady. Keıin ózi qalaǵan jaǵdaıda brondy joıa alady.

Tapsyrysty oryndaý merzimi – 2025 jyldyń 31 jeltoqsany.

Eske salaıyq, buǵan deıin Almatyda tarıhı tulǵalardyń zırattary tsıfrlyq kartaǵa engizilgenin jazǵanbyz. 

2023 jyly Astanada zırattardy tsıfrlandyra bastaǵanyn jazǵan edik.