Zırat ornyna salynǵan park: Pavlodardaǵy áıgili saıabaq týraly ańyzdar
PAVLODAR. KAZINFORM – 60-jyldary Keńes Odaǵynyń eń úzdik saıabaǵy atanǵan Pavlodardaǵy mádenıet jáne demalys saıabaǵynyń burynǵy dańqyn búginde eske salatyn kóp nárse qalmaǵan, dep habarlaıdy Kazinform agenttiginiń tilshisi.
Pavlodardaǵy qalalyq HH ǵasyrdyń 30-jyldary burynǵy Voskresensk zıratynyń ornyna salyndy.
Alǵashynda bul jerde aǵashtar ǵana otyrǵyzylǵan. Al saıabaqtyń resmı ashylýy tek 1946 jyly tamyzda ótti.
– Ortalyq saıabaqty jóndeý men abattandyrýǵa shyndap kiristi. Aýmaǵyn qorshap, fontan ornatyp, gúlzarlar jasady. 1947 jyly órtengen drama teatrynyń ornyna jazǵy kınoteatr salyndy. «Leto» kafesi ashyldy. Saıabaqqa kiretin ortalyq qaqpany erekshe bezendirýge kóńil bólindi. Onyń aldyna aqyn Vladımır Maıakovskııdiń músini qoıyldy, - deıdi Pavlodardyń jergilikti tarıhshysy Lıýdmıla Baıýsheva.
Tarıhshynyń aıtýynsha, 60-jyldary qalalyq saıabaqty tek Qazaqstan emes, búkil Keńes Odaǵyndaǵy eń úzdik saıabaqtardyń biri dep moıyndaǵan.
1962–1968 jyldary saıabaqta túrli attraktsıondar ornatylyp, Pavlodardaǵy eń alǵashqy aınalmaly dóńgelek paıda boldy. Tipti munda planetarıı men kúlki bólmesi de bolǵan.
– Saıabaqta kásibı ártister de, áýesqoı óner ujymdary da óner kórsetetin. Munda merekeler toılanyp, túrli kórmeler men kitap jármeńkeleri uıymdastyrylatyn. Qalalyq saıabaq pavlodarlyqtar úshin basty ári eń súıikti demalys orny boldy. Ásirese demalys jáne mereke kúnderi adam óte kóp bolýshy edi, - dedi Lıýdmıla Baıýsheva.
Sonymen qatar qalalyq saıabaq ornalasqan burynǵy qorym jaıly qala turǵyndarynyń arasynda túrli ańyzdar taraǵan. Bul jerde pavlodarlyq belgili Derovtar, Karbyshevter men Sýrıkovtar áýletiniń otbasy músheleri de jerlengen eken.
Jurttyń sózine sensek, qorymdy tegistep, jermen-jeksen etkenimen, súıekterdi eshkim qazyp alyp, basqa jerge kóshirmegen kórinedi. Tek bolshevıkterdiń baýyrlastar zıraty ǵana saqtalǵan.
Osydan keıin bul jerde eldiń qııaly erekshe damydy ma, álde shyn máninde tylsym oqıǵalar boldy ma belgisiz. Ańyzdardyń birine sensek, ortalyq saıabaq aýmaǵynda qurylys júrgizgenderdiń barlyǵy jumys aıaqtalǵannan keıin kóp uzamaı, kútpegen jerden qaıtys bola bastaǵan kórinedi.
Al eń tanymal ańyz – aq kóılek kıgen qyz týraly. Jurt túnde onyń elesi saıabaq aýmaǵynda qalyqtap júredi deıdi.
Pavlodar ortalyq saıabaǵy osydan 15 jyl buryn ǵana halyqtyń eń jaqsy kóretin demalys orny edi. Biraq aýmaqty jóndeý men jańartý úshin sheneýnikter eshteńe istep jatqan joq. Ary ketse, tas tósemderin aýystyrǵanyn ǵana kóre alasyz. Qyzmet etý merzimi áldeqashan ótip ketken attraktsıondardy jyl saıyn áıteýir júrip tursyn dep jóndep qoıady. Biraq jańa eshteńe ákelmeıdi.
Aıtpaqshy, saıabaqtyń jaǵdaıy máz bolmasa da, qala turǵyndary áli kúnge mereke kezinde, ásirese Balalardy qorǵaý kúni bul jerge kóptep jınalady.
Eske salsaq, burynyraqta pavlodarlyqtar ortalyq parktegi eki attraktsıonnyń joq bolyp ketkenin baıqaǵan. Al qala ákimdigi olardy josparly jóndeý úshin alyp tastaǵanyn aıtty.
Buǵan deıin Pavlodarda jańajyldyq is-sharalarǵa jyldaǵydan 8 ese az qarajat bólingeni týraly jazǵan edik.