Zınedın Zıdan bas bapkerlik qyzmetten ketpek
ASTANA. QazAqparat - «Real Madrıd» komandasynyń bas bapkeri Zınedın Zıdan maýsym sońynda qyzmetinen ketýge bel býdy, dep habarlaıdy prosports.kz ıspanııalyq «Marca» basylymyna silteme jasap.
Mamandardyń aıtýynsha komandanyń sátsiz oıyny men syrtqy álemnen túsken jan tózgisiz qysym Frantsýz mamanyn sharshatyp jibergen. Ol dál mynadaı qysym astynda jumys jasaýdyń qıyndyǵyn sezingen kórinedi.
Biraq, dál qazir ketse de Zıdannyń ókinýine esh sebep joq. Eki jylda komandaǵa segiz birdeı chempıondyq ataq jeńip alyp berdi. La lıgada jeńimpaz bolǵanyn aıtpaǵan kúnniń ózinde, qatarynan eki márte Chempıondar lıgasyn jeńip alǵanynyń ózi nege turady.
Dese de, «Real Madrıd» syndy klýbta taban terep turý úshin bul da jetkiliksiz. Qashan komandaǵa kómektesýge jaramaı qalasyń, sol kezde orynyńdy bosatýǵa týra keledi. Meıli ataqty Zınedın Zıdan bolsań da!
Zıdannyń komandasy La lıgadaǵy basty qarsylasy «Barselonadan» 19 upaıǵa qalyp ketti. Chempıondar lıgasy men Ispan kýbogyndaǵy joryǵyn áli jalǵastyrda degenińizben, dál mynadaı súreńsiz oıynymen uzaqqa shabatyndaryna sený qıyn.
Zızýdyń Koroldyq klýbpen kelisimsharty 2018 jylǵa deıin jasalǵan. Ózi keıde komandamen 2020 jylǵa deıin kelisimim bar dep júr. Biraq, biz bilgende eki tarap áli jańa shart jasasa qoıǵan joq. Tipti, aıaqtalmaǵan kelisim merzimi bar bolǵan kúnniń ózinde bunyń Zıdandy komandada alyp qalýy ekitalaı.
Dańyqty oıynshy Zınedın Zıdan fýtbolshylyq mansabyn 2006 jyly dál osy «Real Madrıd» sapynda aıaqtady. Sol kezde onyń komandamen kúshine ıe kelisimsharty bar bolatyn. Germanııada ótken Álem chempıonatyn ókinishpen aıaqtaǵan Frantsııa quramasynyń kapıtany Madrıdte jalǵasty dop tebe berýine bolar edi. Biraq, Zıdan jaraqatyna baılanysty býtsasyn shegege ilgen edi.
Endi 12 jyldan keıin sol jaǵdaı qaıtalaný aldynda tur. 2017 jylǵy álemniń úzdik bapkeri Zınedın Zıdan da qaljyratqan kóńil jaraqatyna baılanysty bapkerlik tizginin basqaǵa ótkizip berýi múmkin.
