Zınaıda Fedotova: Egemendik deklaratsııasy – Táýelsizdikke bastaǵan alǵashqy qadam
Qazaqstan Respýblıkasy Prezıdent arhıvinde «Táýelsizdik bárinen qymbat» atty dóńgelek ústel ótti. Tarıhı qujattyń kýágerleri 33 jyl burynǵy estelikpen bólisti, dep habarlaıdy Kazinform.
Jıynǵa deklaratsııanyń daıyndalýy men qabyldanýyna atsalysqan Qazaq SSR Joǵarǵy Keńesiniń XII shaqyrylymnyń depýtattary men memleket jáne qoǵam qaıratkerleri, shyǵarmashylyq zııaly qaýym ókilderi, Arhıv ujymy qatysty.
Aıtýlarynsha, azattyqtyń alǵashqy qarlyǵashy egemendik deklaratsııasy Almatyda qabyldandy. Sondyqtan Ońtústik Astana táýelsizdiktiń besigi sanalady. 33 jyl buryn joǵary keńes depýtattary elimizdiń egemendik deklaratsııasyn qabyldady. 360 depýtattyń biri ǵalym, akademık, ekonomıka ǵylymdarynyń doktory, QR Memlekettik syılyǵynyń ıegeri Orazaly Sábdenov sol tarıhı sátti bylaı eske aldy.
«Deklaratsııa bizge jol ashty. Konstıtýtsııany qabyldaýǵa túrtki boldy. Biz Joǵary keńestiń ishinde kúndiz-túni jumys istep jatyrmyz. Syrtynda halyq. Olardyń kún kóris jaǵdaıy qıyn. Aqsha qunsyz. Ol kezde teńge áli shyqpaǵan edi. Sol kezde ǵalymdar shyǵyp halyqqa bárin túsindirdi. Bolashaqtyń jarqyn bolatynyn aıtty», - deıdi Orazaly Sábdenov.
Sonymen qatar ol jastardy bilim men ǵylymǵa umtylýǵa shaqyrdy.
«Qazaqtyń jastary bilim men ǵylym qýyp, órkenıettiń qataryna qosylýǵa umtylýy kerek», - dedi ol.
Professor, Qazaqstan Respýblıkasynyń eńbek sińirgen zańgeri Zınaıda Fedotova deklaratsııa elimizdiń táýelsizdik jolyndaǵy alǵashqy qadam ekeniń atap ótti.
«Sol kezden bastap Qazaqstan egemendi elge aınalýynyń alǵyshartyn bastap ketti. Elimizdiń jeke terrıtorııasy, azamattyǵy, memlekettik bıýdjeti, halyqaralyq qatynastardaǵy derbestigi, memlekettik rámizderi bekitildi. Sondyqtan 25 qazan – Repýblıka kúni ulttyq mereke retinde atap ótilýi durys dep oılaımyn. Barsha qazaqstandyqty osy aıtýly merekemen shyn júrekten quttyqtaımyn», - dedi Qazaq KSR Joǵarǵy Keńesiniń XII shaqyrylymnyń depýtaty Zınaıda Fedotova.
