Zymyran shabýylynan keıingi qalpyna keltirý bes jylǵa sozylýy múmkin — QatarEnergy
ASTANA.KAZINFORM — Qatardyń memlekettik munaı-gaz kompanııasy Qytaı, Ońtústik Koreıa, Italııa jáne Belgııaǵa uzaq merzimdi suıytylǵan tabıǵı gaz (STG) jetkizýge fors-major jarııalanýy múmkin ekenin habarlady.
Qatar energetıka mınıstri, QatarEnergy prezıdenti ári bas dırektory Saad Ál-Kaabıdiń aıtýynsha, zymyran soqqylary kompanııanyń eksporttyq qýatynyń 17%-yn isten shyǵardy. Qatar Energy kompanııasynyń jyldyq kiris shyǵyny 20 mıllıard dollarǵa deıin jetýi múmkin.
— Óndiris nysandaryna keltirilgen úlken zalaldy qalpyna keltirý úshin bes jylǵa deıin ýaqyt ketedi jáne bizdi uzaq merzimdi fors-major jarııalaýǵa májbúr etedi, — dep atap ótti mınıstr.
Ol shabýyldar jalpy qýaty jylyna 12,8 mıllıon tonna bolatyn eki STG óndiris jelisine zaqym keltirgenin aıtty. Eki jeli de QatarEnergy men ExxonMobil kompanııalarynyń birlesken kásiporny.
Mınıstr suıytylǵan tabıǵı gaz óndirisiniń toqtatylýy onymen baılanysty ónimder eksportynyń da tómendeýine ákeletinin atap ótti: kondensat (24%-ǵa), suıytylǵan munaı gazy (13%-ǵa), gelıı (14%-ǵa) jáne nafta men kúkirt (6%-ǵa).
Buǵan deıin Parsy shyǵanaǵy elderi munaı óndirisin azaıtqany habarlanǵan bolatyn.
Taıaý Shyǵystaǵy qaqtyǵys saldarynan gaz baǵasy kúrt ósti.
