Zımbabvedegi jaǵdaıdy retteýge Afrıka odaǵy qatysýda - SІM
ASTANA. QazAqparat - QR Syrtqy ister mınıstri Qaırat Ábdirahmanov Zımbabvede oryn alǵan jaǵdaıǵa baılanysty pikir bildirdi, dep habarlaıdy QazAqparat.
«Ózderińiz bilesizder, Qazaqstan BUU Qaýipsizdik keńesiniń múshesi. Atalǵan keńestiń negizgi maqsattarynyń biri beıbitshilik pen qaýipsizdikti qamtamasyz etý. Osy oraıda biz Zımbabvedegi ahýal qarýly qaqtyǵyssyz, beıbit jolmen sheshilýine múddelimiz»», - dedi mınıstr Senatta tilshilerge bergen suhbatynda.
Qaırat Ábdirahmanov óz sózinde Zımbabvedegi jaǵdaıdy retteýge Afrıka odaǵy qatysyp jatqandyǵyn jetkizdi.
«Zımbabve bul daǵdarysty beıbit jolmen eńsere alady dep oılaımyn. Olar ózderiniń ishki saıası jaǵdaıyn retteýge qaýqarly ekendigine úmittimiz», - dedi QR Syrtqy ister mınıstr.
Budan buryn habarlanǵandaı, Zımbabveniń áskerıleri eldi 1980 jyldan beri basqaryp kele jatqan respýblıka prezıdentin qamaýǵa aldy.
Bul týraly 15 qarasha kúni áskerı qyzmet ókilderiniń málimdemesine silteme jasap Associated Press málim etti. Buǵan deıin ásker qarjy mınıstrin tutqyndap, memlekettik telekompanııa ǵımaratyn baqylaýǵa alǵan bolatyn. 14 qarasha kúni keshke qarýlanǵan áskerler Zımbabve astanasy Hararede mańyzdy pozıtsııada turdy. Zımbabve áskeri qalyptasqan jaǵdaıdy «qan tógissiz túzetýge» balap, áskerı tóńkeris dep ataýdan bas tartty.
