Zımbabvede jańa prezıdent saılandy

PRETORIıA. QazAqparat - Zımbabve prezıdent saılaýynda Emmerson Mnangagva jeńiske jetti, dep habarlaıdy VVS.

Zımbabveni 20 jyl basqarǵan Robert Mýgabe otstavkaǵa ketkennen keıin elde alǵash ret parlament jáne prezıdent saılaýlary ótkizildi. 10 provıntsııadaǵy daýystardy sanap shyqqan soń, ortalyq saılaý komıssııasy Emmerson Mnangagvanyń prezıdent saılaýynda eń kóp daýys jınaǵanyn málim etti.

Mnangagva saılaýda 50,8% daýys jınaǵan, al onyń basty qarsylasy Nelson Chamızdi saılaýshylardyń 44,3%-y jaqtaǵan.

«Zımbabve afrıkalyq ulttyq odaǵy» partııasynyń basshysy Emmerson Mnangagvany qoldaǵandardyń sany 2,46 mıllıonǵa jetken.

Óz kezeginde, oppozıtsııa ókilderi saılaý nátıjeleriniń aqylǵa qonymsyz ekenin aıtyp, baıbalam salyp otyr. Mnangagva saılaýshylardyń jartysynan astamynyń daýsyn jınaǵandyqtan, saılaýdyń ekinshi týryn ótkizýge qajettilik qalmady.