Zımbabvede eki avtobýs soqtyǵysyp, kem degende 30 adam qaza tapty
ASTANA. QazAqparat - Zımbabvede eki avtobýstyń soqtyǵysýy saldarynan kem degende 30 adam qaza tapty jáne 36 adam jaraqattandy, dep habarlady RIA Novostı.
Frans Press agenttiginiń aqparatynsha, oqıǵa beısenbi kúni Zımbabve astanasy Harareden eldiń ońtústik-batysyndaǵy Býlavaıo qalasyna aparatyn avtotrassada oryn aldy. Polıtsııa aqparatynsha, júrip bara jatqanda avtobýstardyń biriniń dońǵalaǵy jaryldy. Sol sebepti ol qarsy jolaqqa shyǵyp ketken.
"Keshe jol-kólik apaty oryn alǵanyn rastaı alamyn. Jıyrma segiz adam, sonyń ishinde eki júrgizýshi oqıǵa ornynda qaza tapty, taǵy eki adam Kvekve qalasynyń aýrýhanasynda kóz jumdy", - dedi jergilikti polıtsııa ókili Cherıtı Charamba.
Ol 32 japa shekkenniń jaǵdaıy aýyr ekenin aıtty.
