Zımbabvede belgisiz sebeppen qyrylǵan pilderdiń sany 22-ge jetti
NUR-SULTAN. QazAqparat – Sońǵy segiz kúnde Zımbabveniń ońtústigindegi Hvange qoryǵynda kenetten qyrylǵan pilderdiń sany 22-ge jetken. Bul týraly QazAqparat jergilikti «News-24» jańalyqtar qyzmetine silteme jasap habarlaıdy.
«Biz pilderdiń ne sebepti qyrylǵanyn áli bilmeımiz. Aldyn ala zertteý júrgizgen mamandardyń pikirinshe, olardyń ólimine bakterııalyq juqtyrý sebep bolǵan. Alaıda, bakterııanyń dál qaı túri ekeni túsiniksiz», - dep málimdedi Zımbabve qoryqtar men jabaıy tabıǵatty qorǵaý basqarmasynyń ókili Tınashe Faravo.
Alǵashqy bolyp qyrylǵan 12 pil 29 tamyz kúni Hvange qoryǵy men Pandamasýe ormanynyń shekarasynda, Vıktorııa sarqyramasynyń mańynda tabylǵan.
«Barlyq janýarlardyń azýlary bútin bolǵan, ıaǵnı buǵan brakonerlerdiń qatysy joq ekenin bildiredi», - dep atap ótti Faravo.
Eki táýlikten soń Hvangede osyǵan uqsas jaǵdaıda qyrylǵan taǵy 10 pildiń óleksesi tabyldy.
Qoryq bıligi eki jastan alty jasqa deıingi pilderdiń boıy tym alasa bolatyndyqtan aǵash basynan japyraq jeı almaıtyndyǵyn aıtady. Sondyqtan olar jerge jaqyn ósip turǵan japyraqtardy, sondaı-aq shópti jep, sol arqyly aýrý týdyrýshy bakterııalar juqtyryp alýy múmkin degen boljam jasap otyr.
