Zımbabve bıligi qurǵaqshylyqtan qutylý úshin 200 pildi óltirýdi josparlap otyr

ASTANA. KAZINFORM — Zımbabveniń qorshaǵan ortany qorǵaý mınıstrligi elde pil tym kóbeıip ketti dep málimdedi. ZimParks jabaıy tabıǵat parkiniń basshylyǵyna óltiriletin janýarlardy irikteý tapsyryldy, dep habarlaıdy BILD basylymy.

Sheneýnikterdiń aıtýynsha, bul qadam tez ósip kele jatqan pilder popýlıatsııasyn baqylaýǵa kómektesedi, sonymen qatar tótenshe qurǵaqshylyqtyń saldaryn joıýǵa sebepshi bolmaq.  

ZimParks qoryǵynyń basshysy Fýlton Mangvanıanyń AFP agenttigine aıtýynsha, bılik barlyǵy 200 pilden qutylýdy kózdep otyr. 

Zımbabvede barlyǵy 100 myńǵa jýyq pil mekendeıdi, el osy janýarlardyń sany boıynsha Botsvanadan keıingi ekinshi orynda. 

Zımbabvede pilder sońǵy ret 1988 jyly atylǵan.

Buǵan deıin Namıbııa sońǵy onjyldyqtaǵy eń aýyr qurǵaqshylyq saldarynan 700 jabaıy janýardyń, onyń ishinde pilder men sýsıyr joıylatynyn málimdegen. Namıbııanyń qorshaǵan ortany qorǵaý mınıstrligi 160-qa jýyq janýardyń óltirilgenin habarlady.

Bul shara sý resýrstaryn tutynýdy jeńildetý jáne qurǵaqshylyqtan ashtyqqa ushyraǵan myńdaǵan adamdy etpen qamtamasyz etý úshin jasalǵan. Úkimettiń buıryǵyn janýarlar quqyǵyn qorǵaýshylar qatty synǵa aldy.

Zımbabve men Namıbııa — qurǵaqshylyqqa baılanysty tótenshe jaǵdaı jarııalaǵan ońtústik Afrıka elderi tobynda.