Zımbabve bıligi keminde 50 pildi atýǵa ruqsat berdi

ASTANA. KAZINFORM —  Pilderdiń shekten tys kóbeıýi sebepti Zımbabve bıligi olardyń sanyn azaıtý úshin keminde 50 pildi atýǵa sheshim qabyldady, dep habarlaıdy AZERTADJ.

Zımbabveniń Ulttyq parkter men jabaıy tabıǵatty qorǵaý basqarmasy taratqan málimdemede, eldiń ońtústigindegi Seıv-Vellı qoryǵynda shamamen 2550 pil mekendeıtini aıtylǵan. Alaıda qoryqtyń ekojúıesi 800 pilge ǵana qolaıly jaǵdaı jasaı alady.

Sońǵy bes jyl ishinde bul qoryq 200 pildi basqa qoryqtarǵa kóshirý arqyly popýlıatsııany retteýge tyrysqan, dep jazady Reuters agenttigi.

Atylǵan pilderdiń etin jergilikti turǵyndarǵa taǵam retinde taratý, al pil súıegin qoryq ákimshiligine tapsyrý josparlanǵan.

Zımbabve — álemdegi pilder popýlıatsııasy eń kóp elderdiń biri. Alaıda klımattyń ózgerýi adamdar men jabaıy tabıǵat arasyndaǵy qaqtyǵysty kúsheıtip jiberdi. Pilder tamaq pen sý izdep, adamdar turatyn aýmaqtarǵa kirip ketip jatyr.

Ótken jyly da Zımbabve bıligi shamamen 200 pildi atýǵa ruqsat bergen bolatyn. Ol kezde de qurǵaqshylyqtan zardap shekken qaýymdarǵa pil eti taratylǵan. Kóp uzamaı Namıbııa da osyndaı sheshim qabyldaǵan edi.

Osydan buryn Zımbabve bıligi qurǵaqshylyqtan qutylý úshin 200 pildi óltirýdi josparlap otyrǵany habarlandy.