Zilzaladan zardap shekken Albanııaǵa Túrkııa qutqarýshylar ushaǵyn jiberdi

TIRANA. Anadoly – QazAqparat - Zilzaladan zardap shekken Albanııaǵa kómek retinde Túrkııa qutqarýshylarmen qosa arnaıy jabdyqtalǵan ushaǵyn jiberdi, dep habarlaıdy «QazAqparat» HAA Anadoly agenttigine silteme jasap.

Túrkııa áskerı áýe kúshteriniń A400M ushaǵy Albanııaǵa úsh arnaıy kólikti jáne 27 kásibı qutqarýshy mamandy jiberdi. Qutqarýshy top Túrkııa úkimetiniń janyndaǵy Tótenshe jaǵdaılardyń aldyn alý jáne saldaryn joıý basqarmasynyń (AFAD), Túrkııa Ulttyq medıtsınalyq qutqarý komandasy brıgadasynyń (UMKE) jáne Túrkııa Qyzyl jarty aı qoǵamynyń qyzmetkerlerinen jasaqtalǵan.

Olar birden zor shyǵyn kelgen Dýrres qalasyna attandy.

Eske sala keteıik, Albanııada bolǵan 6,4 magnıtýdaly jer silkinisinen kem degende 18 adam qaza tapqanyn habarlaǵan edik.

Albanııanyń Jer, energetıka, sý jáne qorshaǵan orta jónindegi ǵylymı ınstıtýtynyń (IGJEUM) derekterine qaraǵanda, jer silkinisiniń epıtsentri eldiń batysyndaǵy Dýrres qalasynan 15 shaqyrym jerde ornalasqan. Dúmpýdyń oshaǵy 38 km tereńde bolǵan.