Zilzalada 6 kún topyraq astynda óli sábıin qushaqtap jatqan kelinshek: Kúıeýim men ulym úshin de ómir súremin

ANKARA. QazAqparat - Makbýle Kartaı - bıyl 6 aqpanda Túrkııanyń Kahramanmarash provıntsııasynda bolǵan alapat jer silkinisinen aman qalǵan az adamnyń biri. Joldasy men balasy sheıit boldy. Al ózi arada alty kún ótkende úıindi astynan tabyldy, dep habarlaıdy QazAqparat TRT Haber agenttigine silteme jasap.

Qutqarýshylar Makbýleni 6 kúnnen keıin úıindi astynan alyp shyqty.

Qushaǵynda 4,5 aılyq sábıiniń jansyz denesi bar edi. Qasynda jatqan kúıeýi jantásilim etken.

Sol aıaǵy kesilip, 17 operatsııany bastan ótkergen ádebıet pániniń muǵalimi Makbýle protez aıaǵymen júrýdi úırenip júr.

Endi endi óz betinshe qadam basa bastady.

«147 saǵat topyraq astynda jattym. Alǵashqy úsh táýliktiń almasqanyn telefondaǵy oıatqyshtyń shyryldaǵanynan bildim. Kúıeýim sol kúnderi tańerteń erte turýym kerek dep oıatqyshty bir ýaqytqa qoıǵan edi. Odan keıingi kúnderde telefon shyryldamady, kún men túndi ajyrata almadym. Áıteýir qozǵalmastan jattym. Alty kún boıy 4,5 aılyq sábıim qushaǵymda boldy. Bári-bári esimde. Shirkin, eshteńe esimde qalmaǵanda ǵoı dep kúrsinem keıde. Ókinishke qaraı, bolǵan oqıǵanyń bári sanamda saırap tur», - deıdi Makbýle.

Ol qudaıdyń aman alyp qalǵany beker emes, oǵan bir sebebi bar deıdi.

«Aýrýhanadan shyqqan soń ómirimdi ári qaraı jalǵaımyn, joldasym men ulym úshin de ómir súremin. Olar árqashan menimen birge, júregimde bolady. Qatty saǵynyp júrmin otbasymdy» deıdi kelinshek.