Zıka bezgegi Qazaqstanǵa da jetýi múmkin

ASTANA. QazAqparat - QR Ulttyq ekonomıka mınıstrligi janyndaǵy Tutynýshylar quqyǵyn qorǵaý komıteti tóraǵasynyń orynbasary - bas memlekettik sanıtarlyq dáriger Jandarbek Bekshın Qazaqstanǵa Zıka bezgeginiń jetýi múmkin ekendigin joqqa shyǵarmaıdy.

Bul jaıynda J.Bekshın QazAqparat agenttiginiń resmı saýalyna bergen jaýabynda aıtqan.

Onyń atap ótýinshe, Qazaqstan aýmaǵy Zıka bezgegi aýrýy boıynsha endemııalyq óńir emes. ıAǵnı, bezgektiń taralýy úshin tabıǵı orta joq. Zıka bezgegi adamnan adamǵa juqpaıdy. Ol tropıkalyq jáne sýbtropıkalyq beldeýlerde tirshilik etetin Aedes egypti masasy shaqqan kezde adamdarǵa taralady.

«Osyǵan baılanysty Qazaqstan aýmaǵynda, sonymen qatar onymen shektesetin elderde jáne Ortalyq Azııa óńirinde masanyń atalǵan túri kezdespeıdi. Qazaqstanda tirshilik etetin masalalar arasynda Zıka bezgeginiń taralý qaýpi joq. Degenmen, týrıstik belsendilik pen halyq kóshi-qonynyń joǵary bolýyna oraı ınfektsııanyń kelýi qaýpi bar», - dedi ol.

Qazaqstan bas sanıtar dárigeriniń aıtýynsha, el aýmaǵyna Zıka bezgeginiń ákelinýiniń aldyn alý úshin týrıstik operatorlarmen jumystar júrgizilýde. Olar Zıka bezgegi taraǵan elderge saparlaıtyn adamdarǵa, onyń ishinde júkti áıelderde de vırýstyń qaýipti ekendigin túsindirýde. Buǵan qosa Qazaqstannyń memlekettik shekaralarynda shetelden kelgen adamdardy sanıtarlyq-karantındik baqylaý júrgizilýde.

«Zıka bezgegine qarsy dáriniń jáne eminiń bolmaýyna baılanysty Tutynýshylar quqyǵyn qorǵaý komıteti shet elderge sapar josparlaý barysynda usynylǵan aqparatty eskerýge jáne ásirese júkti áıelderde epıdemıologııalyq ahýal turaqtanǵanǵa deıin Zıka bezgegi taraǵan elderge múmkindiginshe saparyn keıinge shegerýge keńes beredi», - dedi J.Bekshın.