Zielinski Rozen, Duracell, Lego jáne Apple: Almatyda tanymal brendterdiń kóshirmesi tárkilendi
ALMATY. KAZINFORM – 2024 jyldyń basynan bastap ádilet organdary jalpy somasy 58,2 mln teńge bolatyn 50 myń kontrafaktilik ónimdi zańsyz aınalymnan aldy. Olardyń qatarynda birneshe álemge tanymal brendterdiń kóshirmesi de bar.
Almaty qalasy Ádilet departamentiniń zııatkerlik menshik quqyqtary bóliminiń basshysy Erkebulan Jetpisbaevtyń aıtýynsha, 2024 jyldyń basynan beri departament qyzmetkerleri 109 jospardan tys tekserý júrgizgen.
– Nátıjesinde jalpy somasy 58,2 mıllıon teńgege 50 myńnan astam kontrafaktilik ónim tárkilendi. Biz tárkilep jatqan kontrafaktilik ónim ekonomıkaǵa ǵana emes, azamattarymyzdyń densaýlyǵyna da qaýip tóndiredi. Biz naryqtyń barlyq qatysýshylar úshin qaýipsiz jáne adal bolýyn qamtamasyz etý úshin jumys isteýdi jalǵastyramyz. Árbir taýardyń artynda brend, árbir brendtiń artynda onyń ıeleriniń quqyqtary men kúsh-jigeri tur, – dep atap ótti E. Jetpisbaev.
Departamenttiń zııatkerlik menshik quqyqtary bóliminiń bas mamany Almas Bekbotaev kontrafaktilik ónimderdi, sonyń ishinde álemdik brendterdi qoldan jasaıtyn taýarlardy tárkileý týraly aıtyp berdi.
– Tárkilengen taýarlardyń qataryna Lego, Zielinski Rozen, Duracell, Perkins, WD-40, Puma, Apple jáne basqa da tanymal brendterdiń ónimderi jatady. Atap aıtqanda, quny 13,1 mıllıon teńge bolatyn Lego óniminiń 10 221 danasy, sondaı-aq 9,6 mıllıon teńgege Zielinski Rozen óniminiń 1838 birligi tárkilendi,– dep atap ótti departament ókili.
Sondaı-aq ol Shymkent qalasynyń Ádilet departamentimen jáne quqyq qorǵaý organdarymen birlesken arnaıy operatsııa belgili shokolad batondar brendiniń atyn jamylǵan 48 000 birlik kontrafaktilik ónimdi tárkileýge múmkin bolǵanyn atap ótti.
— Bul kórsetkishter bılik arasyndaǵy ózara árekettesýdiń joǵary deńgeıin kórsetedi. Biz komandada jumys istegen kezde tutynýshylar men zańdy óndirýshilerdi qorǵaýda aıtarlyqtaı jetistikterge jete alamyz, — deıdi spıker.
Sondaı-aq usaq, biraq mańyzdy zańbuzýshylyqtarǵa erekshe nazar aýdaryldy. Mysaly, 4 mıllıon teńgege 421 Perkins aýylsharýashylyq bólshekteri jáne 400 myń teńgeniń 2 158 Duracell batareıasy tárkilendi.