Zıdan qyzmetinen ketetin bolsa ornyna kim kelýi múmkin
ASTANA. QazAqparat - Madrıdtik «Real» komandanyń bas bapkeri Zınedın Zıdan qyzmetinen ketetin bolsa, onyń ornyna Germanııa quramasynyń bapkeri Ioahım Levti shaqyrmaqshy. Bul týraly Habar 24 habarlaıdy.
Madrıdtik komandanyń basshylary ujymnyń qazirgi nashar kórsetkishterine alańdap otyr. Biraq klýbtyń prezıdenti Florentıno Peres frantsııalyq bapkerge senedi. Degenmen de prezıdent qazirdiń ózinde Zıdannyń ornyn basatyn mamandy taýyp qoıypty. Peres Levpen kelissózder júrgizipti. Kelissózdiń qorytyndysy boıynsha, nemis mamany kelisimin bergen eken.
Zıdan «Realdyń» tizginin 2016 jyldyń qańtar aıynda ustady. Sodan beri ol ujymmen Ispanııa sýperkýbogy, klýbtar arasyndaǵy álem chempıonaty, eki ret Chempıondar lıgasy, ÝEFA sýperkýbogyn jeńip aldy.
Al 2017-2018 jylǵy maýsymda «Real» Ispanııa birinshiliginde onynshy orynda keledi. Koroldik klýb qazir «Barselonadan» 10 upaı qalyp tur.
Lev bolsa 2006 jyldan beri Germanııa quramasynyń bas bapkeri qyzmetin atqaryp keledi. Onyń bastamasymen Germanııa quramasy 2014 jyly álem chempıonatyn jeńip aldy.
