Jyrshy-termeshiler sybaılas jemqorlyqpen kúres taqyrybynda saıysqa túsedi

NUR-SULTAN. QazAqparat - Sybaılas jemqorlyqqa qarsy is-qımyl agenttigi jáne onyń janynan qurylǵan Aqparattyq-aǵartý shtaby jyrshy-termeshilerdiń «ANTIKOR Terme» onlaın respýblıkalyq baıqaýyn jarııalady. Bul jóninde vedomstvonyń baspasóz qyzmetine silteme jasap QazAqparat habarlaıdy.

Onlaın jobanyń basty maqsaty – qazaqtyń tamyry tereń tarıhymen birge jasasyp kele jatqan jyraýlyq dástúrdi, terme men tolǵaýlardy, bes júzge tarta epostyq týyndyny halyqtyń rýhanı-aǵartý ıgiline paıdalanyp, jyraýlyq poezııa arqyly babalarymyzdyń qanyndaǵy tektiligi men tazalyǵyn jastardyń boıyna sińirý.

Onlaın baıqaýǵa qatysatyn Uly dala eliniń ár óńirinen nıet bildirgen kásibı jáne áýesqoı jyrshy-termeshiler parasattylyq pen adaldyqty, ádildik pen shynshyldyqty arqaý etetin, sybaılas jemqorlyqqa qarsy kózqarasqa shaqyratyn burynǵy jáne búgingi aqyn-jyraýlardyń shyǵarmalaryn talǵamy bıik tyńdarmannyń nazaryna usynatyn bolady.

Úmitkerlerdiń arasynda halyqaralyq jáne respýblıkalyq dodalarda top jaryp júrgen Elvıra Esnazar, Elbol Qýanbek, Aıaýlym Qamajan sııaqty tanymal ónerpazdar da bar.

Saıysqa túsetin shyǵarmalar terme mátiniń taqyryptyq maǵynasy, maqam-saz qoldanýy, oryndaýshylyq sheberligi, ónerpazdyń kıim úlgisi, vıdeonyń sapasy sııaqty erekshelikter boıynsha baǵalanady. Baıqaý jeńimpazdaryn onlaın daýys berý arqyly kórermen tańdaıdy.

Baıqaý 26 tamyz kúni bastaldy. Onlaın daýys berý respýblıkalyq aqparattyq-aǵartý shtaby jetekshisiniń Youtube-arnasynda (Yrza Tursynzada Live) júrgiziledi.

Bas júlde ıegerine 1 mıllıon teńge turatyn «Atamura» etnojobasy tabystalady. Sondaı-aq, úzdik óner kórsetken ónerpazdarǵa arnaıy syılyqtar qarastyrylǵan.