Jyrshy-termeshiler arasynda talaby qatań baıqaý ótti
ORAL. QazAqparat - Aqtaý qalasynda Uzaqbaı jyraý Qazjanulynyń 120 jyldyǵyna arnalǵan «Júırigiń edim ónerli!..» atty respýblıkalyq jyrshylar baıqaýy márege jetti, dep habarlaıdy «QazAqparat» tilshisi.
«Jeti qaıqy, bes júırik» óńirlik mádenı tóltýma brendin nasıhattaý maqsatynda uıymdastyrylǵan jyr saıysyna barlyǵy on úmitker qatysyp, baq synady. Olar birinshi týrda Ómir Qaraulynyń «Bata sóz», Uzaqbaı Qazjanulynyń «Janyń qonaq deneńe», «Joldas bolmas bul fánı», ekinshisinde Abyl Tileýulynyń «Toıbastar», Ógizbaı Malgeldiulynyń «Tulpardan tulpar týa almas», Nurym Shyrshyǵulynyń «Bul dúnıeniń mysaly», Aqtan Kereıulynyń «Boljaý sóz» termesin, al sońǵy týrda Uzaqbaı Qazjanulynyń «Burynǵy paıǵambar, shaıhylar týraly» dastanyn mindetti túrde oryndaýǵa tıisti boldy. Talaby osylaısha qıyn bolǵandyqtan shyǵar, Qyzylorda, Astana qalalarynan, Mańǵystaý oblysynan biraz jyrshy ótinish bildirgenimen, kelmeı qaldy.
Mańǵystaýlyq belgili jyrshy-termeshi, professor Amandyq Kómekov bastaǵan qazylar alqasynyń sheshimimen jańaózendik Arǵyn Bısenov bas júldeni (700 myń teńge) jeńip aldy. Ǵ.Qurmanǵalıev atyndaǵy Batys Qazaqstan oblystyq fılarmonııasy «Oral sazy» folklorlyq ansambliniń solısi Farhat Orazov pen jetibaılyq Berdibaı Toıǵulıev birinshi (500 myń teńgeden), taǵy bir jetibaılyq Amanbek Sáýirbaev ekinshi (300 myń teńge), atyraýlyq Amanjol Daýylbaev úshinshi (200 myń teńge) orynǵa ıe boldy.
Aıta keteıik, Farhat Orazov ótken jyly birneshe halyqaralyq, respýblıkalyq baıqaýlarda top jaryp, jeńimpaz-júldeger atanǵan bolatyn. Sondaı-aq bıyl Qaraǵandy qalasynda ótken Qazybek bıdiń 350 jyldyǵyna arnalǵan «Ordaly sózdiń ıesi - Qazybek bı» atty jyrshylar men termeshilerdiń respýblıkalyq baıqaýynda birinshi orynǵa ıe bolǵan edi.
