Jyr alyby Jambyl Jabaev jaıly kóp serıaly kórkem fılm túsirilýde

Kózi tirisinde-aq aty ańyzǵa aınalǵan, qazaq jyrynyń darabozy, ǵasyrǵa jýyq ǵumyr keshken, qazaq mádenıeti, ádebıetine ólsheýsiz mol mura, sarqylmas qazyna qaldyrǵan, qazaq atyn álemge tanytyp, ónerin órge súıregen Jambyldyń ómir joly men óneri osy kórkem týyndyda sýrettelmek, dep habarlaıdy «Qazaqstan» RTRK» AQ-nyń baspasóz qyzmeti.

Ádebıet zertteýshileriniń aıtýynsha, Jambyl Jabaev kóp qyrly uly tulǵa. Onyń aqyndyǵyn, sýyryp salma sheshendigin bylaı qoıǵanda, jyr alyby aıryqsha este saqtaý qabiletine de ıe bolǵan. Mıllıon jol óleńdi jatqa bilgen. «Suranshy batyr», «Ótegen batyr», «Han men aqyn» syndy epostyq jyrlar men «Kóruǵly», «Qyz Jibek» dastandaryn túndi tańǵa asyryp aıtqan. Ol óz zamanynda halqynyń muńyn muńdap, joǵyn joqtaı bildi.

Fılmniń rejısseri - Ánýar Raıbaev («Lave», «Jeńis semseri», «Qazyna» jáne taǵy basqa kınotýyndylardyń rejısseri), stsenarııin jazǵan - Baqytjan Shormaqov.

Jambyldyń rólin Qazaqstan Respýblıkasynyń eńbek sińirgen qaıratkeri, «Daryn» Memlekettik jastar syılyǵynyń laýreaty, akter, ánshi, kompozıtor, dramatýrg Baıǵalı Esenalıev somdaıdy. Kartınada sonymen qatar Aıgúl Úlkenbaeva (Dına Nurpeıisova), Іlııas Turmanov (Lavrentıı Berııa), Áıgerim Sámenova (Kúlásh Báıseıitova), Jolaman Ámirov (Jabaı), Ergenbaı Ábýev (Súıinbaı), Nurbek Muqysh (Kenen Ázirbaev), Boranbaı Moldahmetov (Muhtar Áýezov), Qanat Júnisov (Sáken Seıfýlın), Kentaı Aqúrpekov (Temirbek Júrgenov), Baqyt Bedelhan (Baýyrjan Momyshuly) jáne taǵy da basqa belgili akterler oınaıdy.

Teleserıaldyń negizgi kórinisteri tabıǵaty ásem Almaty oblysynyń «Úshqońyr» baýraıynda, Jambyl oblysy men Máskeý qalasynda túsirildi.

Kórkem týyndynyń rejısseri Ánýar Raıbaev: «Biz túsirip jatqan «Jambyl» atty kórkem fılm 4 bólimnen turady. Qazaq sóz óneriniń «ımprovızatsııa» úrdisin jańa arnaǵa buryp, jańasha mazmun darytqan Jambyl atamyz, qarapaıym qara sózdiń maıyn tamyzyp, talaı aıtysta jeńiske jetken, el aldynda bedeldi edi. Judyryqtaı júregine Jetisý men Alataýdy bylaı qoıǵanda, búkil álemdi syıdyra bilgen, dana aqynnyń elge qaldyrǵan atalyq, danalyq sózderin, el búginde aýzynan tastamaıdy. Júrgen jerinde, «myń ólip-myń tirilgen» barsha qazaqqa batasyn bere júrgen Jambyldyń sol batasy búgingi kúni de jerde qalmaı, armany men oı órisi kókke órlegenine qazirgi «urpaq» biz kýá! Bizdiń maqsat Jambyl atamyzdyń «adamı» tulǵasy men qadir-qasıetin basqa qyrynan kórsetip, abyroıyn kókke órletý».

Endeshe, tarıhı dramany keler jyldyń aqpan aıynda, aqynnyń týǵan kúni qarsańynda «Qazaqstan» telearnasynan tamashalańyzdar!