Jynysyn aýystyrǵan brıtan áskeriniń sarbazy sharıǵat shálisin jamyldy
ASTANA. 6 qyrkúıek. QazAqparat - Brıtan armııasynyń burynǵy áskerı qyzmetkeri Lıýsı Vallender ıslam dinin qabyldap, sarbaz kıimin sanaly túrde sharıǵat shálisine aıyrbastady, dep habarlaıdy muslim.kz saıtynan.
Alaıda, onyń aldaǵy ómiriniń qalaı órbıtinin anyqtap bergen ótken shaǵyndaǵy úlken ózgerisi onyń qazirgi senimine qaıshy keletinin aıta ketý kerek.
28 jastaǵy Vallender buryn er adam bolǵan eken. Osydan birneshe jyl buryn jynysyn aýystyryp, tıisti em qabyldaǵan bolatyn.
Sózine qaraǵanda, ol balalyq shaǵynan jynystyq aýytqýshylyqqa ushyrap, aqyry ota jasatyp tynady.
Jyldar óte kele ol taǵy úlken ózgeristi basynan ótkerýge týra keledi: Vallender asyl dinimizben tanysyp, musylman bolady. Áıtkenmen, buzý ońaı, túzeý qıyn - otashynyń pyshaǵynan qashpaı, qansha tyryssa da, qaıran bolmaǵan soń ótkendegi qateligin túzeýden úmit úzýine týra keldi.
Keıin ol áleýmettik jeli arqyly áldebir musylman er-azamatymen tanysyp, oǵan turmysqa shyǵady. Olar bir shańyraq astynda turmasa da, bir-birimen jıi júzdesedi. Lıýsı kúıeýine ótken ómiri týraly jaq ashpaǵanyn, alaıda jubaıynyń bárin sezetinin tilge tıek etti.
Vallender asyl dinimizdiń barlyq talaptaryn saqtaýǵa tyrysqanymen meshitte ony áıelder bólmesine áreń jiberetinin jetkizdi. Óıtkeni, jamaǵattyń kópshiligi ony áli kúnge er adam retinde qabyldaıdy. Bul jaıynda The DailyMail aqparat kózi habar taratty.
Bir eskeretini, ıslam dininde adamnyń jynysyna qatysty naqty úkim aıtylǵan: adam jynysyna qaraı qalaı jaratyldy, sol qalpynda qalýy kerek. Bul týraly aıat, hadısterde aıtylǵan.
