Jynystyq zorlyǵy úshin halyqaralyq izdeý jarııalanǵan 27 qazaqstandyq ustaldy - ІІM
NUR-SULTAN. QazAqparat – Jynystyq sıpattaǵy zorlyq-zombylyǵy úshin izdeý jarııalanǵan 27 qazaqstandyq ustaldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
«7 maýsymnan bastap ótizilip jatqan «Mıgrant» jedel aldyn alý is-sharasy barysynda izdeýde júrgen 78 qylmysker ustaldy. Olardyń qatarynda jynystyq sıpattaǵy zorlyq-zombylyq jasaǵany úshin halyqaralyq izdeý jarııalanǵan 27 qazaqstandyq jáne TMD elderiniń 3 adamy bar. Kóshi-qon qyzmetiniń málimetine sáıkes, «Mıgrant» operatsııasy barysynda kóshi-qon zańnamasyn buzǵandarǵa qatysty 518 sot sheshimi qabyldandy. Olar el aýmaǵynan shyǵaryldy», - dedi Nurdildá Oraz.
Sonymen qatar ol Іshki ister mınıstriniń atyna kún saıyn azamattardan polıtsııa qyzmetkerlerine alǵys aıtqan hattar kelip túsetindigin aıtty. Máselen, Almaty turǵyny Medeý aýdandyq polıtsııa basqarmasynyń aǵa jedel ýákili Abzal Sháripovke alaıaqty izdestirýdegi jedel jumysy úshin alǵys bildiredi.
«Joǵary sapaly oryndalǵan jumys úshin alǵysymdy bildirgim keledi. Abzal óziniń biliktiligi arqyly polıtseıdiń boıynda qandaı qasıetteri bolýy kerektigin kórsetti. Óziniń qyzmettik mindetterin oryndaýǵa óte jaýapty qaraıdy. Bir jyldan astam ýaqyt izdeýde júrgen kúdiktini jedel taýyp, jetkizdi. Osyndaı saýatty mamandardyń arqasynda barlyq qylmyskerler tıisti jazaǵa tartylýy úshin jumysta sáttilik tileımin!»,- dep jazady hat avtory Bolǵanaı Kámetova.
