Jyn shyǵaramyn dep kisi ólimine kúdikke ilingen emshi qamaýdan shyqty
TALDYQORǴAN. QazAqparat - Almaty oblysynda 28 jastaǵy jigittiń ólimine kúdikke ilingen halyq emshisi eki aıǵa úıqamaqqa alyndy, dep habarlaıdy QazAqparat tilshisi.
«15 qańtarda kúdikti eki aıǵa úıqamaqqa alyndy», - dep málimdegen edi oblystyq sottyń baspasóz qyzmeti.
Al buǵan deıin oblystyq polıtsııa departamenti 63 jastaǵy emshiniń ýaqytsha ustaý oqshaýlaǵyshynda jatqanyn resmı túrde málimdegen bolatyn.
Esterińizge sala keteıik, kisi ólimi týraly fakt 12 qańtarda Qarasaı aýdanynda tirkelgen. Sot-medıtsınalyq saraptama barysynda 28 jastaǵy azamattyń keýde tusynan qatty jabyq jaraqat alǵany, birneshe qabyrǵalarynyń synǵany jáne ókpesiniń zaqymdanǵany anyqtalǵan. Osy aýyr jaraqattar kisi ólimine sebep bolýy múmkin. Atalǵan fakti boıynsha is qozǵaǵan polıtsııa kisi ólimine kúdikti retinde jergilikti emshini ustady. «Marqumnyń týystary tarapynan polıtsııaǵa resmı aryz áli túsken joq. Degenmen, oqıǵa boıynsha QR Qylmystyq kodeksiniń 3 bólimi, 106 baby boıynsha (Kisi ólimine ákep soǵatyn densaýlyqqa qasaqana aýyr zalal keltirý) sotqa deıingi tergeý júrgizilýde. Kúdikti retinde dástúrli emes medıtsınamen aınalysatyn 63 jastaǵy azamat ustaldy», - delingen oblystyq polıtsııa departamentiniń baspasóz baıanynda.
Belgili bolǵandaı, marqumdy emshige týystary ákelgen. Olar jas jigittiń ishinde jyn bar dep oılaǵan. Marqum bolǵan jigit sońǵy úsh jyldan beri naýqas eken. Emshi jigittiń boıynan jyndy shyǵaramyn dep bes kún boıy «emdegen». Osynyń saldary kisi ólimine soqtyrǵan bolýy múmkin.
