Jyljymaıtyn múliktiń biryńǵaı memlekettik kadastry jasalýda - Úkimet basshysy

NUR-SULTAN. QazAqparat - Jyljymaıtyn múliktiń biryńǵaı memlekettik kadastry jasalyp jatyr. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.

«Taǵy bir mańyzdy másele – jer qatynastaryn tsıfrlandyrý. Jyljymaıtyn múliktiń biryńǵaı memlekettik kadastryn jasaý boıynsha aýqymdy jumys júrgizilip jatyr. Ol jer ýchaskeleri, qurylystar men ǵımarattar jónindegi derekterdi qamtıtyn bolady», - dedi ol.

Asqar Mamın Úkimet Parlamentke Jyljymaıtyn múliktiń biryńǵaı memlekettik kadastry aıasynda memlekettik kórsetiletin qyzmetterdi tsıfrlandyrý máseleleri jónindegi zań jobasyn engizgenin aıtty.

«Zań jobasy biraz qyzmetterdi elektrondy formatqa aýystyrýǵa, jer ýchaskelerin berý tártibin ońaılatýǵa, jalpy halyqqa kórsetiletin qyzmetterdiń sapasyn jaqsartýǵa múmkindik beredi», - dedi Úkimet basshysy.