Jyljymaıtyn múlikti bir kúnniń ishinde tirkeýge bolady

ASTANA. 20 aqpan. QazAqparat - Budan bylaı jyljymaıtyn múlikke quqyq belgileýshi qujatty rásimdegennen keıin notarıýs birden sol jerde quqyqtardy tirkeýge ótinim bere alady.

Bul týraly elektrondy úkimet portaly habarlap otyr.

Portaldyń jazýynsha, notarıýs ótinish berýshi týraly málimetterdiń úlgisin toltyryp, Qazaqstan Respýblıkasy Ádilet mınıstrliginiń Ádilet departamentine jóneltedi, sondaı-aq, ótinishti qabyldaý jáne tólemniń somasy týraly habarlamany alady.

«Notarıýs biregeı nómirmen habarlamany basyp shyǵaryp, ony ótinish berýshige beredi. Osydan keıin klıent elektrondyq úkimet portalynda tólemdi júrgizýi qajet. Ol úshin ótinish berýshi portalda tirkeledi, al elektrondy qoltańbanyń qajeti joq», - delingen habarlamada.

Sosyn, Ádilet departamentiniń mamandary elektrondyq chekti alysymen, jyljymaıtyn múlikke quqyqtardy tirkeýge kirisedi.

Nátıjesinde quqyqty tirkeý týraly habarlama notarıýsqa, sondaı-aq ótinish berýshiniń elektrondyq mekenjaıyna beriledi.

Osylaısha, bir jumys kúninen aspaıtyn ýaqyt ishinde jyljymaıtyn múlikti satyp alý jáne oǵan quqyqty tirkeýge bolady.

Búgingi kúni jyljymaıtyn múlikke quqyqty elektrondyq tirkeý qyzmeti Qazaqstannyń barlyq óńirlerinde qoljetimdi.

Bul týraly http://www.egov.kz/wps/portal/Content?contentPath=/egovcontent/house/est_relation/passport/pass065_mu&lang=ru siltemesinen, sondaı-aq 1414 nómiri boıynsha táýlik boıy call-ortalyqtyń mamandarynan naqtyraq bilýge bolady.