Jyljymaıtyn múlikke tehpasportty EGOV.KZ arqyly alýǵa bolady

ASTANA. 15 shilde. QazAqparat - Jyljymaıtyn múlik obektileriniń tehnıkalyq pasportyn alýǵa ótinish berý endi edáýir jeńildedi.

Ótinish berýshige elektrondyq úkimettiń www.egov.kz portaly arqyly onlaın ótinish jasap, Jyljymaıtyn múlik ortalyǵynyń qyzmetkeriniń qońyraýyn kútý ǵana kerek. Mamandar klıentke tehnıktiń kelýine yńǵaıly ýaqytty naqtylaý úshin qońyraý shalady. Onlaın ótinishte quqyq belgileıtin qujattyń skan-kóshirmesi jáne qyzmetke tólem jasalǵany jaıly túbirtek qosa bolýy qajet. Bolashaqta qyzmetti elektrondyq úkimettiń portaly arqyly onlaın túrde tóleýge múmkindik ashylady.

Ótinish qabyldanbaǵan jaǵdaıda, paıdalanýshynyń jeke kabınetine onyń sebebin túsindirgen dáıekti jaýap qaıtarylady.

Sonymen, ótinish berýshige atqarýshy organǵa qujattardy tapsyrý úshin barýdyń qajettiligi joq. Onlaın ótinish berilgennen keıin, klıent belgilengen ýaqytta HQKO-na daıyn qujatty alýǵa keledi. Buryn ótinish berýshi memlekettik organǵa 5 ne odan da kóp qujattarmen kelip jáne tehpasportty 5-ten 30 kúnge deıin kútetin bolǵan.

Daıyn tehnıkalyq pasportty berý merzimi jyljymaıtyn múlik nysanynyń túrine baılanysty. Mysaly, páterler men jataqhanadaǵy bólmelerge qujat úsh jumys kúni aralyǵynda beriledi. Úıler, garajdar, saıajaılarǵa jeti jumys kúni aralyǵynda, aýdany 1000 sharshy metrge deıingi nysandarǵa tehpasportty on kúnde, al aýdany 1000 sharshy metrden astam nysandarǵa jıyrma kún aralyǵynda alýǵa bolady.

Tehpasport alý barysynyń jedeldetilýi bıznes úderisti avtomattandyrý men ońtaılandyrýǵa, qyzmet kórsetý kezinde halyqtan talap etiletin qujattar sanynyń azaıýy arqasynda boldy.

Búginde bul qyzmet Astana men Almaty qalalarynda iske qosyldy. Qanatqaqty rejim aıaqtalǵannan keıin qyzmet respýblıkanyń barlyq aımaqtarynda koljetimdi bolady.

Tolyǵyraq aqparatty táýlik boıy jumys atqaratyn call-ortalyq mamandarynan 1414 nómiri arqyly bilýge bolady.