Jyljymaıtyn múlik salasynda elektrondyq tirkeý keńeıtiledi
NUR-SULTAN. QazAqparat - «Qazaqstan Respýblıkasynyń keıbir zańnamalyq aktilerine jyljymaıtyn múlikke quqyqtardy jáne zańdy tulǵalardy memlekettik tirkeý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Bul zań jobasy Parlamenttiń bir top depýtattarymen ázirlendi.
«Jyljymaıtyn múlikke quqyqtardy tirkeý salasyndaǵy vedomstvoaralyq úılestirýdiń tıimdiligin arttyrý eskerilgen.
Quqyqtyq kadastrdyń aqparattyq júıesi men ýákiletti organdar men uıymdardyń aqparattyq júıeleriniń ıntegratsııalyq ózara is-qımyly arqyly quqyqtyq kadastrdan aqparat alýǵa baǵyttalǵan normalar kózdelgen. Sonymen qatar, jyljymaıtyn múlikke quqyqtardy tirkeýdiń qoldanystaǵy rásimderin ońtaılandyrý jáne memlekettik qyzmetter kórsetý protsesteriniń satylaryn jetildirý qarastyrylǵan. Elektrondyq tirkeý keńeıtiledi. Múddeli organdarǵa jyljymaıtyn múlikke quqyqtardy memlekettik tirkeý úshin quqyq belgileıtin qujattardyń elektrondyq kóshirmelerin jiberý múmkindigi beriledi», - dedi Májilis depýtaty Qanat Mýsın.
Osy oraıda ol notarıýstarda bul salada oń tájirıbe bar ekenin jetkizdi. 2012 jyldan bastap «Biryńǵaı notarıattyq aqparattyq júıe» «Jyljymaıtyn múlik tirkelimi» derekqorymen biriktirildi.
«Mámile jasalǵannan keıin quqyq belgileıtin qujattardyń kóshirmeleri memlekettik tirkeý úshin elektrondyq túrde jiberiledi. Múlikti satyp alýshy nátıjeni 1 jumys kúni ishinde alady. Nur-Sultan jáne Shymkent qalalarynda ekinshi deńgeıdegi bankterdiń kepilin elektrondyq tirkeý boıynsha pılottyq joba iske asyryldy. Pılottyq jobaǵa «Forte Bank» AQ qatysady. Jergilikti atqarýshy organdar múlikti jekeshelendirý sharttaryn elektrondyq tirkeý úshin «Jyljymaıtyn múlik tirkelimi» derekqorymen ıntegratsııalaýǵa daıyndyǵyn bildirdi», - dedi depýtat.
Onyń aıtýynsha,qazirgi kezde menshik ıesi óz jyljymaıtyn obektisin nemese qurylysyn buzǵan jaǵdaıda, onyń menshik quqyǵyn toqtatý máselesi zańda rettelmegen. Óıtkeni búgingi kúni eshbir memlekettik organ obektini buzý faktisin rastamaıdy.
«Bul másele boıynsha azamattardyń kóptegen aryz-shaǵymdary týyndap, olar sotqa júginýge májbúr bolady. Osyǵan baılanysty, zań jobasynda obektini buzýdy rastaıtyn qajetti qujattardy rásimdeý tártibin aıqyndaıtyn norma kózdelgen. Bul normaǵa sáıkes obektini buzý faktisin rastaý ókilettigin, sáýlet jáne qala qurylysy salasyndaǵy organdarǵa júkteledi. Sondaı-aq, zań jobasynda ákimshilik kodeksten jyljymaıtyn múlikke quqyqtardy tirkeý merzimin buzǵany úshin jaýaptylyq alyp tastalady. Sebebi Zańnan jyljymaıtyn múlikti memlekettik tirkeý úshin alty aılyq merzimin joıý usynylady. Bul qajettilik ózimen-ózi joıyldy, óıtkeni menshik quqyǵyn tirkeý boıynsha qyzmetterdiń kópshiligi, sonyń ishinde aýyrtpalyqtar salý boıynsha qyzmetter elektrondyq formatqa aýystyrylady», - dedi Qanat Mýsın.
