Jyljymaıtyn múlik quqyǵy mindetti túrde elektrondyq tártippen tirkeletin bolady
ASTANA. QazAqparat - Notarıaldyq kýálandyrylǵan mámile jasasqan jaǵdaıda jyljymaıtyn múlikke quqyqty mindetti túrde elektrondyq tártippen memlekettik tirkeý jasalady.
Bul týraly búgin Parlament Májilisiniń jalpy otyrysynda Ádilet mınıstri Berik Imashev málim etti. Jalpy otyrysta «Qazaqstan Respýblıkasynyń keıbir zańnamalyq aktilerine menshik quqyǵyn qorǵaýdy kúsheıtý, sharttyq mindettemelerdi qorǵaýdy kepildendirý jáne olardy buzǵany úshin jaýapkershilikti qatańdatý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
«Jyljymaıtyn múlikke quqyqty memlekettik tirkeý Halyqqa qyzmet kórsetý ortalyqtaryna júginý arqyly ne bolmasa biryńǵaı notarıattyq aqparattyq júıe arqyly elektrondyq nysanda júzege asatyn bolady. Elektrondyq tirkeýdi mindetti túrde engizý osy saladaǵy jetekshi elderdiń tájirıbesi negizinde ázirlendi. Bul tirkeý kezindegi menshik quqyǵyna jasalatyn ártúrli zańsyz áreketterden qorǵaýdy kúsheıtý maqsatynda jasalyp otyr. Soǵan oraı, bundaı quqyqtardy qaǵaz túrindegi tirkeý balamasy alynyp tastalady», dedi Berik Imashev. Bundaı bastamany Májilis depýtattary da qoldap otyr. Máselen, depýtat Aıtkúl Samaqovanyń aıtýynsha, mindetti túrde elektrondyq tirkeýdi engizý alaıaqtyq áreketterdiń aldyn alýǵa septigin tıgizetin bolady. «Bul óte durys. Eń bastysy yńǵaıly, barlyq sharttar ortaq bazaǵa tirkeledi. Ekinshiden, shart jasasýshylardyń da ýaqytyn únemdeýge, jeńildetýge jol ashady», - dedi depýtat A. Samaqova.
