Jyljymaıtyn múlik qory jalǵa beriletin baspanalarǵa qatysty salyq máselesin jyl sońyna deıin sheshetin bolady
ASTANA. QazAqparat - «Samuryq-Qazyna» jyljymaıtyn múlik qory» AQ basshylyǵy jalgerlerdiń ókilderimen kezdesti. Kezdesýde Basqarýshy dırektor - Basqarma múshesi Tımýr Qaldybaev jaldamaly páterge salyq salý máselesine qatysty Jyljymaıtyn múlik qorynyń resmı ustanymyn málimdep, atalǵan máseleniń jyldyń aıaǵyna deıin sheshiletinin aıtty. Bul týraly qordyń baspasóz qyzmetinen habarlandy.
Eske sala keteıik, 2013 jyldan bastap jeke tulǵalarǵa satyp alý quqyǵymen jaldaý sharttary boıynsha berilgen múlikke salyq salynǵan bolatyn. «Osyǵan baılanysty «Jyljymaıtyn múlik qory» salyq mólsherlemesin qaıta qaraý týraly usynyspen Úkimetke birneshe ret shyqqan edi. Óıtkeni, bul máseleniń memlekettik baǵdarlama boıynsha páter alatyn jalgerlerdiń múddesine tikeleı qatysy bar. 2015 jyly Jyljymaıtyn múlik qory «Qazaqstannyń ıpotekalyq kompanııasy» AQ-men birlesip, Salyq kodeksine ózgerister engizýge qol jetkizdi. Onda memlekettik baǵdarlamanyń operatorlary úshin satyp alý quqyǵymen jalǵa alynǵan páterge salynatyn salyqtyń mólsherin tómendetý múmkindigi kózdelgen», - delingen baspasóz baıanynda.
Qazirgi kúni memlekettik baǵdarlama operatorlarynyń biri «QIK» AQ Óńirlerdi damytýdyń salalyq baǵdarlamasynyń qatysýshysy bolyp tabylatyn jeke tulǵalardyń mólsherlemeleri boıynsha esepteıtin zańdy tulǵalardyń tizbesine endi. Al «Jyljymaıtyn múlik qory» salalyq baǵdarlamanyń operatory bola tura, atalǵan Tizbege enbeı qalǵan.
Osyǵan oraı, Tımýr Qaldybaev kompanııa basshylyǵy salyq mólsherlemelerin tómendetý talabymen Jyljymaıtyn múlik qoryn tizbege qosý boıynsha jumystardy júrgizetinin málimdedi. «Biz jalgerler úshin atalǵan máseleniń qanshalyqty mańyzdy ekenin túsinemiz. Sondyqtan Úkimetpen jáne Qazaqstan Respýblıkasynyń Ulttyq ekonomıka mınıstrligimen syndarly qarym-qatynasymyzdy jalǵastyra beremiz. Jyljymaıtyn múlik qory qabyldaǵan sharalar kútkendeı nátıje ákelmegen jaǵdaıda, máseleni sheshýdiń basqa joldaryn izdestiremiz. Jyljymaıtyn múlik qory 2016 jyldyń sońyna deıin salyq salý máselesin sheshýdi kózdep otyr», - dedi T. Qaldybaev.
