Jyljymaıtyn múlik qory elordalyq «Aqjaıyq» jáne «Ál-Arqa» turǵyn úı keshenderindegi páterlerge ótinish qabyldaýdyń aıaqtalǵanyn habarlady
ASTANA. Mamyrdyń 14-i. QazAqparat - «Samuryq-Qazyna» Jyljymaıtyn múlik qory» aktsıonerlik qoǵamy men «Jyljymaıtyn múlik menedjmenti» jaýapkershiligi shekteýli seriktestigi, mamyrdyń 12-sinen bastap elordalyq «Aqjaıyq» jáne «Ál-Arqa» turǵyn úı keshenderindegi páterlerdi jalǵa alýǵa jáne keıin satyp alý múmkindigimen jalǵa alýǵa ótinish qabyldaýdyń aıaqtalǵanyn habarlady.
Sońǵy málimetter boıynsha, barlyǵy 1130 ótinish tirkelgen, onyń 673-i - «Aqjaıyq» turǵyn úı keshenindegi páterlerge, 457-si «Ál-Arqa» keshenindegi páterlerge berilip otyr, dep habarlady «Samuryq-Qazyna» Jyljymaıtyn múlik qorynyń baspasóz qyzmetinen.
Samuryq-Qazyna» Jyljymaıtyn múlik qorynyń Turǵyn úı jáne kommertsııalyq (turǵyn emes) jaılardy satýdyń erejesine sáıkes, ótinish berýshilerdiń reıtıngi men páterlerdi aldyn ala bólýge kelý kezegi mamyrdyń 14-inde Qordyń saıtynda - www.kazproperty.kz - jarııalanady.
