«Jyljymaıtyn múlik qory» 300 myń sharshy metrden astam baspana salyp, paıdalanýǵa berdi

ASTANA. QazAqparat - Jyljymaıtyn múlik qory elimizdiń naryǵynda 6 jyldan astam qyzmet etip keledi. «Samuryq-Qazyna» qorynyń enshiles kompanııasy retinde qurylǵan sátinen bastap Jyljymaıtyn múlik qorynyń qatysýymen jalpy aýdany shamamen 1,4 mln. sharshy metr nysan paıdalanýǵa berildi.

Bul týraly Qordyń baspasóz qyzmetinen habarlandy.

«Óńirlerdi damytýdyń 2020 jylǵa deıingi baǵdarlamasynyń baspanamen qamtý baǵyty boıynsha jeke menshik kompanııalarmen áriptestik aıasynda shamamen 770 myń sharshy metr (13 500 páter) paıdalanýǵa berilmek, onyń ishinde shamamen 620 myń sharshy metr (10 800 páter) Jyljymaıtyn múlik qoryna tıesili. Osy arqyly «Jyljymaıtyn múlik qory» úsh birdeı strategııalyq mindetti oryndap oty, bular - qoljetimdi baspana salý, jańa jumys oryndaryn qurý arqyly áleýmettik shıelenis deńgeıin tómendetý jáne qurylys materıaldaryn óndiretin jergilikti kásiporyndardy jumyspen qamtamasyz etý», - delingen baspasóz baıanynda.

Málimetterge qaraǵanda, Jyljymaıtyn múlik qorynyń qyzmeti arqasynda respýblıkanyń 11 óńirinde 4 myńnan astam jańa jumys orny ashylǵan. Aǵymdaǵy jyldyń qorytyndylary boıynsha, iske asatyn jobalardaǵy jergilikti qamtý úlesi ortasha eseppen alǵanda, 80 paıyzdan asady. Sonymen qatar, qazirgi tańda Jyljymaıtyn múlik qory Óńirlerdi damytý baǵdarlamasy aıasynda jalpy aýdany 315 myń sharshy metrden astam 9 turǵyn úı keshenin salyp, paıdalanýǵa bergen.

«Tutastaı alǵanda, «Jyljymaıtyn múlik qory» baǵdarlamany iske asyrý boıynsha turǵyn úılerdi paıdalanýǵa berýdiń 2015 jylǵa arnalǵan josparyn 150 myń sharshy metr mólsherinde oryndady. Páterlerdiń 70 paıyzǵa jýyǵy turǵyndarǵa satyp alý quqyǵymen jaldaý arqyly berildi. Bul rette turǵyndar jaldaýdyń búkil merziminde, ıaǵnı 15 jyl, bir sharshy metr úshin belgilengen aı saıynǵy somany tóleıdi. Jaldaý baǵasy teńgemen bekitilgen jáne jaldaýdyń búkil merzimi ishinde qunsyzdanýǵa qaramastan ózgerissiz qalady», - delingen baspasóz baıanynda.