Jyljymaly medıtsınalyq keshender shalǵaı aýyldardy aralaýda
TÚRKІSTAN. QazAqparat – Túrkistan oblysynda jyljymaly medıtsınalyq keshender arqyly koronavırýspen kúres kúsheıtildi. Kentaý qalalyq emhanasynyń qyzmetkerleri jyljymaly keshenmen shalǵaı aýyldardy aralap, qyzmet kórsetýge kiristi, dep habarlaıdy QazAqparat tilshisi.
Taıaýda ǵana satyp alynǵan jyljymaly emhananyń alǵashqy qabyldaýy Kentaý qalasyna qarasty Eski Iqan aýylynyń Dostyq eldi mekeninen bastaldy. Atalǵan aýyldyń 150-ge jýyq turǵynyn emhananyń kardıolog, gınekolog, pedıatr, rentgen, ÝDZ, JTB dárigerleri qarap, medıtsınalyq tekserýden ótkizdi. Onyń nátıjesimen naýqastarǵa tıisti emdik sharalary men joldamalar berildi. Aq halattylar ásirese koronavırýs ınfektsııasymen kúreske asa zeıin qoıǵan. Turǵyndardyń deni ókpelerin zamanaýı rentgen apparatyna túsirip, indettiń aldyn alý boıynsha dárigerlik keńes aldy. Tekserý barysynda Covid-19 ınfektsııasymen kúdikti naýqas tirkelgen joq. Aýyl turǵyndarynyń medıtsınalyq qyzmetterge qol jetimdiligin arttyrý maqsatynda emhana dárigerleri kelesi jyldan bastap bekitilgen tizimge sáıkes shalǵaı aýyldardy aralaıtyn boldy. Jalpy, óńirde koronavırýs indetiniń taralýyna qarsy kúres sharalary aıasynda alynǵan 12 jyljymaly medıtsınalyq keshen flıýrografııa, ýltra dybystyq apparat, zertteýlerge arnalǵan analızatorlar, oftalmoskop, glıýkometr jáne taǵy basqa quraldarmen jabdyqtalǵan.
