Jyljymaly quramdy tirkeý merzimi qysqardy - Kólik jáne kommýnıkatsııa mınıstrligi
ASTANA. 17 naýryz. QazAqparat - Búgin QR Kólik jáne kommýnıkatsııa Mınıstrliginiń Kóliktik baqylaý komıtetinde Kóliktegi sybaılas jemqorlyqqa qarsy kúres jónindegi keńestiń kezekti májilisi ótti.
Sybaılas jemqorlyqpen kúres memlekettik baǵdarlamasyn júzege asyrý sheńberinde ótkizilgen jıynǵa «Nur Otan» HDP, qarjy polıtsııasy, temirjol kóligindegi kásiporyndary qaýymdastyqtarynyń ókilderi, sondaı-aq, memlekettik bas kólik ınspektorlary qatysty.
«Kezdesýde temirjol kóliginde baqylaý-qadaǵalaý qyzmetin iske asyrý barysynda týyndaıtyn problemalar, sondaı-aq, sybaılas jemqorlyq kórinisterin joıý úshin ózara birlesip áreket etý boıynsha birlesken sharalar belgileý máseleleri talqylandy. Bul rette Kóliktik baqylaý komıteti tóraǵasynyń orynbasary Áset Asaýbaev kóliktik baqylaý qyzmetin uıymdastyrý máselelerinde ashyqtyq qaǵıdasynyń mańyzdylyǵyn atap ótti. Onyń aıtýynsha, 2010 jyly Komıtet temirjol jyljymaly quramyn jóndeý sapasynyń máseleleri boıynsha kóliktik prokýratýra, «QTJ UK» AQ, «Qamqor Menedjment» JShS, temirjol jyljymaly quramyn jóndeý qyzmetin kórsetetin jeke jóndeý kásiporyndarynyń ókilderi qatysýymen jınalystar ótkizdi. Sonyń nátıjesinde, temirjol jyljymaly quramyn tirkeý merzimi qaıta qarastyrylyp, tirkeý merzimi 30 jumys kúnnen 20 jumys kúnge deıin qysqartyldy. Sonymen qatar, aldaǵy ýaqytta tirkeý merzimin 15 jumys kúnine deıin qysqartylýy josparlanýda», - delingen mınıstrliktiń taratqan baspasóz aıǵaǵynda.
Keńestiń qorytyndysy boıynsha qatysýshylarmen ózara birlesip áreket etýdiń tıimdi ádisteri usynylyp, osy salada sybaılas jemqorlyq kórinisterin boldyrmaýǵa baǵyttalǵan birqatar syndarly usynystar engizildi.
