Jyljymaly kólik postylarynyń qatary kóbeıýde - Kólik jáne kommýnıkatsııa mınıstrligi
ASTANA. 10 jeltoqsan. QazAqparat - Búgin Astana qalasynyń «Qyzyl jar» kóliktik baqylaý beketinde aýmaqtyq ınspektsııalarǵa 16 jyljymaly kólik baqylaý postylaryn tapsyrýdyń saltanatty rásimi ótti. Jańa avtomobılderdiń kiltin Kólik jáne kommýnıkatsııa mınıstrliginiń jaýapty hatshysy Jeńis Qasymbek tapsyrdy.
QR Kólik jáne kommýnıkatsııa mınıstrliginiń baspasóz qyzmetiniń habarlaýynsha, jyljymaly posttardy engizý tasymaldaý qaýipsizdigin arttyrý jáne respýblıkanyń barlyq aýmaǵynda kóliktik baqylaýdy qamtamasyz etý qajettiligimen negizdeledi. Sonymen birge, avtomobıl joldary jelisin saqtaý, sharýashylyq sýbektilerine, jolaýshylardy zańsyz jóneltý oryndaryna naqty jáne sapaly tekserýlerdi júzege asyrý, sondaı-aq statsıonarlyq kóliktik baqylaý beketterin aınalyp ótý faktilerine jol bermeý mańyzdy aspektiler bolyp tabylady.
Joǵaryda atalǵan máselelerdi sheshý maqsatynda aǵymdy jyldyń 12 naýryzynan bastap jyljymaly kóliktik baqylaý postylarynyń jumysy uıymdastyryldy.
Jyljymaly kóliktik baqylaý postylarynyń jalpy paıdalanymdaǵy avtomobıl joldarynda, qalalar men ózge de eldi mekenderdiń sheginde, sondaı-aq statsıonarlyq kóliktik baqylaý posttarynan tys jerlerde avtokólik quraldaryn toqtatý quqyǵy bar.
Qazirgi ýaqytta respýblıkanyń avtomobıl joldarynda 25 jyljymaly kóliktik baqylaý postylarymen 80 baǵyt boıynsha kóliktik baqylaý júzege asyrylady. Búgin beriletin 16 jyljymaly postqa qosa kelesi jyly qosymsha 8 avtomobıldi satyp alý josparlanyp otyr. Jalpy alǵanda, atalǵan avtomobılderdi satyp alý úshin respýblıkalyq bıýdjetten 255 mln. teńge qarajat jumsaldy.
Jyljymaly post «Hýndaı» markaly avtomobıldiń negizinde jasalǵan, navıgatsııa júıesimen, syrtqy jáne ishki beınebaqylaý, arnaıy baǵdarlama, elektrondy tarazy, tútin ólshegish, gaztaldaýysh jáne basqa da baqylaý-ólsheý qurylǵylarymen jabdyqtalǵan.
Sonymen birge, avtokólik quraldaryn birneshe ret tekserýdi boldyrmaý, sybaılas jemqorlyq sıpattaǵy buzýshylyqtarǵa jol bermeý maqsatynda jyljymaly posttar Kóliktik baqylaý komıteti bekitken kesteler men baǵyttar boıynsha jumys isteıdi jáne onlaın rejıminde baqylanyp otyratyn bolady.
Aǵymdy jyldyń 10 aıynda jyljymaly kóliktik baqylaý postylarymen 18830 buzýshylyq anyqtalyp, jalpy somasy 234 mln.teńge aıyppuldar men alymdar óndirildi.
