Jylyjaı sharýashylyqtaryn qoldaýǵa sýbsıdııalar bólindi - Serik Jumanǵarın
Bul shymkenttiktermen sońǵy jarty jyldaǵy ekinshi kezdesý. Birinshi kezdesýde bıznes-qoǵamdastyq bıznestiń tolyqqandy damýyna kedergi keltiretin kóptegen mańyzdy máseleni kótergen bolatyn. Bul joly da Serik Jumanǵarın Úkimettiń halyq pen kásipkerlerdi qoldaý aıasyndaǵy sharalary týraly habardar etýmen qatar, qarashadaǵy birinshi kezdesýde aıtylǵan máseleler boıynsha jumystyń iske asyrylý barysy týraly esep berdi.
Óńirlerde jıi kóteriletin jún men teri eksportyna kedendik jeńildikter máselesi – sheshilgender qatarynda.
«Bul másele túrli óńirlerde, ShQO-da, Astanada qoı sharýashylyǵymen aınalysýshylarmen kezdesken kezde birneshe ret kóterildi. Jaqynda ol boıynsha sheshim qabyldandy: 22 aqpanda Vedomstvoaralyq komıssııanyń otyrysynda júnge EKB nóldik mólsherlemesin uzartý máselesi maquldandy. Respýblıkalyq bıýdjet komıssııasy oń qorytyndy shyǵarǵannan keıin SIM kedendik áketý bajdary qoldanylatyn taýarlardyń tizbesine ózgerister engizý boıynsha qajetti rásimderdiń barlyǵyn júrgizedi», — dedi Serik Jumanǵarın.
Taǵy bir mańyzdy másele boıynsha jumys jasalyp jatyr – jergilikti qamtý úlesi bóliginde «Samuryq-Qazyna» qorynyń memlekettik organdary men kompanııalary satyp alǵan jeńil ónerkásip taýarlaryna ST-KZ taýarlarynyń shyǵý sertıfıkattarynyń bolýy. Bul máselemen SIM Tehnıkalyq retteý jáne metrologııa komıteti aınalysady. Komıtet Qordyń satyp alýlaryna taldaý júrgizip, yqtımal sáıkessizdikterdi anyqtap, olardy joıý jónindegi sharalardy Qormen birge pysyqtap jatyr.
Ótken jyldyń qarasha aıynda ońtústik óńirlerdiń kásipkerleri Eýropa elderine ónim eksporttaý úshin aýyl sharýashylyǵy kásiporyndarynyń eýrokodty akkredıtteý jáne alý protsesin jedeldetýdi surady. Serik Jumanǵarın Aýyl sharýashylyǵy mınıstrligi bul máselemen aınalysyp jatqanyn túsindirdi. Jaqynda Brıýsselge sapary aıasynda aýyl sharýashylyǵy mınıstri Erbol Qarashókeev pen «QazTrade» Saýda saıasatyn damytý ortalyǵy» AQ bas dırektorynyń orynbasary Ásel Egemberdıeva eýropalyq komıssarlarmen kezdesti. Kelissózder nátıjesinde bıylǵy 15 naýryzda resmı túrde balyq jetkizýshilerdiń tizimi jańartylatyn boldy. Frantsııa jáne Shveıtsarııamen qazaqstandyq balyq ónimderin satyp alýǵa kommertsııalyq ýaǵdalastyqtar qolda bar. Qazirgi tańda balyq sharýashylyǵy óndirýshileriniń aýdıt jumystary aıaqtalýǵa jaqyn. Bul shara bal, sút jáne et ónimin óndiretin eksporttaýshylardy tizilimge engizý jumystaryn bastaýǵa yqpal etpek.
Ekinshi kezdesý barysynda qala turǵyndary men kásipkerleri astyq tasymaldaý, asyl tuqymdy mal sharýashylyǵyn damytýdy sýbsıdııalaý, Qazaqstannyń batys nemese shyǵys óńirlerine taýarlardy jetkizý úshin ońtústik óńirler óndirýshileriniń jol shyǵyndaryn sýbsıdııalaý múmkindigi, el ishindegi otandyq toqyma buıymdarynyń básekege qabilettiligi jáne t.b. máselelerdi kóterdi. Atap aıtqanda, «Otan-Agro» JShS basshysy Berik Oryntaev jylyjaılardy sýbsıdııalaý máselesin kóterdi.
«Búginde respýblıkanyń ónerkásip jylyjaılarynyń negizgi úlesi Shymkentte shoǵyrlanǵan. Maýsymaralyq kezeńde kommýnaldyq qyzmetterge aqy tóleý jylyjaı sharýashylyqtarynyń jaǵdaıyn nasharlatady. Kommýnaldyq qyzmetter úshin jylyjaı tólemderiniń 50%-yn sýbsıdııalaýǵa múmkindik bar ma?» — dep surady ol.
Serik Jumanǵarın Úkimettiń jylyjaı sharýashylyqtaryn qoldaý sharalary jónindegi jumysy týraly aıtyp berdi.
«Aqpan aıynda men Túrkistan oblysynyń Saryaǵash jáne Maqtaaral aýdandarynda boldym. Qysta qatty aıazdan jáne qardyń kóp túsýinen, sondaı-aq kómir jetispeýshiliginen jylyjaılar zardap shekti. Óńirde eki mln-nan astam adam turady jáne memlekettiń basty mindeti – óndiristerdi, jańa jumys oryndaryn damytý úshin barynsha jaǵdaı jasaý. Jylyjaı sharýashylyqtaryn qoldaýǵa sýbsıdııalar bólý týraly sheshim qabyldandy. Qazir jylyjaılar úshin ulttyq standart ázirlenýde, ol bekitilgennen keıin jylyjaı sharýashylyqtaryna sýbsıdııalar bólý múmkindigi úshin zańnamaǵa ózgerister engiziletin bolady. Kómir boıynsha jaqynda Shubarkól kómir qorynyń basshylyǵymen jylyjaılarǵa kómirdi tikeleı bırja arqyly, dılerlerdiń kómegimen satý múmkindigi boıynsha ýaǵdalastyqqa qol jetkizildi. Sondyqtan bul másele de jaqyn arada sheshiledi dep oılaımyn», — dedi vıtse-premer.
Bıznes-qoǵamdastyqpen kezdesýden keıin Serik Jumanǵarın azamattardy jeke qabyldap, BAQ úshin brıfıng ótkizdi.
Eske salsaq, buǵan deıin mol jaýǵan qar túrkistandyq 167 sharýanyń jylyjaıyn jaramsyz kúıge túsirgeni týraly habarladyq.