Jylytý maýsymyna daıyndyq: Semeı turǵyndary úshin 260 myń tonna kómir jetkizilmek
SEMEI. QazAqparat – Semeı qalasynda jylytý maýsymyna qyzý daıyndyq júrgizilýde, dep habarlaıdy QazAqparat tilshisi.
Qazirgi ýaqytta Semeıde jer úıler turǵyndary úshin otyn kózi daıyndalýda. Bıyl halyqtyń muqtajdyǵyn qamtamasyz etý maqsatynda 260 myń tonna kómir jetkizý josparlanǵan. Bul týraly qalalyq TÚKSh bóliminiń basshysy Amantaı Ótelbaev málim etti.
«Kómir jetkizýdi «Jiger» jáne «Semeı kómir» JShS júzege asyrady. Sondaı-aq satylymda surypty kómir bar. Kólikpen jetkizý qyzmetin qosa eseptegende, onyń quny tonnasyna 12 700 teńgeni quraıdy. Kómirdi belsendi satyp alýdyń negizgi kezeńi – tamyz-qyrkúıek aılary. Shaharda ortalyqtandyrylǵan jylýǵa 1187 úı qosylǵan. Onyń ishinde 423 úı jylý berý maýsymyna daıyn. Bul az kórsetkish. Dese de arnaıy toptar qurylyp, bul baǵytta jumystar júrgizilip jatyr», - dedi ol.
Bilim berý nysandaryna kómir jetkizý boıynsha da jumystar júrgizilýde. Semeı óńirinde barlyǵy 66 mektep bar. Onyń 51-i qalada ornalasqan.
«Ortalyq jylý júıesine 43 mektep, avtonomııalyq jylý júıesine 8 mektep qosylǵan. Qazirgi ýaqytta 19 mektep boıynsha 125 247 myń teńgege kómir jetkizýge sharttar jasaldy. 12 myń tonnadan astam kómir satyp alý josparlanǵan. Jumysty 1 tamyzǵa deıin aıaqtaý josparlanýda», - dedi Amantaı Ótelbaev.
