Jylytý maýsymy kezinde órtten 190 adam kóz jumdy

ASTANA. QazAqparat - 2016-2017 jylǵy jylytý maýsymy kezinde Qazaqstanda órtten 190 adam kóz jumdy. Bul týraly búgin brıfıngte QR ІІM Tótenshe jaǵdaılar komıtetiniń tóraǵasy Vladımır Bekker málim etti, dep xabarlaıdy QazAqparat.

"Azamattar óz qaýipsizdigine salǵyrt qaraıdy. Órt nemese ıis tıip ýlaný ózderinde oryn almaıdy dep esepteıdi. Osynyń saldarynan óte qaıǵyly jaǵdaılarǵa ushyrap jatady", - deıdi Bekker.

Jalpy 2016-2017 jylǵy jylytý maýsymy kezinde turǵyn úı sektorynda 3,6 myń órt tirkelgen. Onyń ishinde jer úılerde - 1400, kóppáterli úılerde - 448. Qazaqstanda órtten 190 adam kóz jumyp, 252 adam jaraqattanǵan. Sonymen qatar 472 adam qutqarylyp, 6,9 mlrd. teńgeniń múlki aman saqtap qalýǵa múmkin bolypty.

Onyń aıtýynsha, órt pen onyń saldarynan kóz jumatyndardyń sany Shyǵys Qazaqstan, Qaraǵandy jáne Almaty oblystarynda kóp. Ólimge negizinen órt kezinde uıqyda bolý (42%) jáne mas bolý (33%) sebep bolady. Sonymen qatar úıde qaraýsyz qalǵan balalar da órt kezinde kóp qaza tabady. Osy merzim ishinde elimizde 8 búldirshin órtten jantásilim etken.

Órtke negizinen adamdardyń otyndy durys paıdalanbaýy (1335 oqıǵa), peshti paıdalaný kezinde órt qaýipsizdigin ustanbaý (966 oqıǵa), elektrjabdyqtardy qaýipsizdik talaptaryna saı ornatpaý jáne tutynbaý (466 oqıǵa), balalardyń otynmen oınaýy (178 oqıǵa) sebep bolǵan.

 Bekkerdiń aıtýynsha, peshti durys tutynbaýdyń saldarynan ıis tıip ýlaný faktileri de azaımaı otyr. Bıylǵy jylytý maýsymynda 29 adam ıis tıip kóz jumsa, 363 adamnyń densaýlyǵyna zardaby tıgen.