Jylytý maýsymy: Qazaqstanda jer úıler jyldaǵydan bir aı buryn tekserildi
NUR-SULTAN. QazAqparat – QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker bıyl jer úılerdiń jylytý júıeleri men elektr jelileri byltyrǵydan 1 aı buryn tekserile bastaǵanyn málim etti, dep habarlaıdy QazAqparat tilshisi.
«Qazaqstanda tirkeletin órtterdiń úshten biri jylytý maýsymy kezinde jeke sektorda tirkeledi. Bizde ol 15 qazannan bastalyp, 15 sáýirde aıaqtalady. 2018-2019 jyldyń jylytý maýsymynda elimizdiń jeke sektorlarynda 4382 órt tirkelip, onyń saldarynan 192 adam kóz jumdy. Iis tııý saldarynan 51 adam kóz jumdy», - dedi Vladımır Bekker elordada ótken baspasóz máslıhatynda.
Komıtet tóraǵasy jylytý maýsymynda eldi tilsiz jaýdyń qaýpinen eskertý jumystary júrgizilgenin atap ótti.
«Elordada osy jyldyń 4 sáýirinde bes balanyń ólimimen aıaqtalǵan qaıǵyly jaǵdaıdy barlyqtaryńyz bilesizder. Osyǵan baılanysty biz taldaý jumystaryn júrgizip, jumys barysyna ózgeris engizdik. Buryn órt qaýipsizdigi aılyǵyn 20 qyrkúıekten bastaıtynbyz. Bıyl bul jumysty eki kezeńge bóldik. Birinshi kezeń 15 tamyzda bastalady. Onda jeke sektordy aralaımyz. Jylytý maýsymynyń aldynda úılerdiń jylytý júıesiniń daıyndyǵyn, elektr jelisiniń durystyǵyn tekseremiz. ıAǵnı, jylytý maýsymyna deıin ýaqyt baryn eskerip, úı ıesi kemshilikterdi túzeıtindeı ýaqyt bar. Ekinshi kezeń 15 qazanda bastalady. Demek, jylytý maýsymy bastalǵanda jylý júıesi, qaýipsizdik erejeleriniń saqtalýy tekseriledi», - dedi komıtet basshysy.
Úıdegi pesh pen elektr jelilerin tekserý jumystaryn buryn TJD qyzmetkerleri ǵana tekserse, qazirgi ýaqytta bul jumysqa basqa da memlekettik organdardyń, atap aıtqanda, bilim basqarmalarynyń, halyqty áleýmettik qorǵaý basqarmalarynyń qyzmetkerleri jumyldyrylýda.
«15 tamyzda bizdiń bólimsheler 260 myńnan astam adamdy qamtıtyn 154 725 jeke úıdi tekserip, nátıjesinde 39 myń buzýshylyqty anyqtady. Onyń 19 myńy elektr jelilerin paıdalaný júıesine qatysty bolsa, 12 myńy jylý júıesin montajdaý jumysyna baılanysty bolyp otyr. Ótken jyldan beri álemdik tájirıbege súıene otyryp, jeke sektorǵa ysty gaz týraly eskertetin datchıkterdi ornatýdy nasıhattaı bastadyq. Zeınetkerlerge, kópbalaly analardyń otbasylaryna datchıkter jergilikti bıýdjet esebinen satyp alynady», - dedi ol.
Sonymen birge, komıtet tóraǵasy halyqqa úndeý tastady.
«Jylytý júıesine, elektr jelilerine erekshe mán bergen abzal. Jylytý maýsymy bastalmaı turyp, olardyń bárin retke keltirý kerek», - dedi Vladımır Bekker.
