Jylytý maýsymy bastalǵaly órtten 12 adam kóz jumdy - TJK
ASTANA. QazAqparat - Jylytý maýsymy bastalǵaly Qazaqstanda órt saldarynan 12 adam qaza tapty, dep habarlaıdy «QazAqparat» HAA tilshisi QR ІІM Tótenshe jaǵdaılar komıtetiniń resmı ókili Rýslan Imanqulovqa silteme jasap.
Rýslan Imanqulov keltirgen málimetke súıensek, jylytý maýsymy bastalǵaly beri, ıaǵnı 15 qazan men 2 qarasha aralyǵynda respýblıka boıynsha jeke turǵyn úı sektorlarynda tirkelgen órt saldarynan 12 adam kóz jumdy.
«2016 jyldyń osy kezeńimen salystyrǵanda turǵyn úı sektorynda qaza bolǵandar boıynsha kórsetkish 36 paıyzǵa (2016 jyly 19 adam qaıtys bolǵan), kómirqyshqyl gazymen ýlaný saldarynan mert bolǵandar boıynsha jalpy kórsetkish 4 esege (2016 jyly 8 adam kóz jumdy) tómendedi. Iis tııý jaǵdaıy sońǵy ret 2017 jyldyń 6 qarashasynda tirkeldi. Onda qatty otynmen janatyn peshtiń aqaýlyǵy saldarynan 2 adam ýlanǵan. Onyń bireýi oqıǵa ornynda kóz jumdy. Iis tııý boıynsha qaıǵyly oqıǵalardyń biri Semeı qalasynda, ekinshisi SQO Taıynsha aýdany Taıynsha qalasyndaǵy jeke turǵyn úı aýmaǵyndaǵy monshada oryn aldy», - dep habarlaıdy Rýslan Imanqulov.
QR ІІM Tótenshe jaǵdaılar komıteti jylytý maýsymy órt pen kómirqyshqyl gazyna ýlany jaǵdaılary boıynsha asa qaýipti kezeń ekenin eskertedi.
«Jylytý peshterin paıdalaný qaǵıdalaryn buzý - ys tııý sııaqty qaıǵyly oqıǵalarǵa ákep soqtyrady. Ýly gazdyń shyǵýy jıi oryn alatyn sebebi - peshti durys paıdalanbaý. Jylytý maýsymy bastalǵannan beri TJD qyzmetkerleri 2 179 821 úıdi esepke alyp, aýlalardy aralaý barysynda 99 288 turǵyn úıdi tekserip shyqty», - dedi resmı ókil.
