Jylytý maýsymy: Almatyda jeke sektordaǵy úılerge baqylaý kúsheıedi

ALMATY. QazAqparat – Almaty qalasy tótenshe jaǵdaılar departamentiniń zilzala qaýip-qaterin azaıtý jáne azamattyq qorǵaý salasyndaǵy baqylaý basqarmasy bastyǵynyń mindetin atqarýshy Talǵat Dúısebaev onlaın brıfıngte jeke sektorda órtke qarsy qaýipsizdikti baqylaýdy kúsheıtý qajettigin aıtty, dep habarlaıdy QazAqparat tilshisi.

«Bıylǵy jylytý maýsymyna daıyndyq barysynda aýdandyq ákimdiktermen birlesip, úı tizimi jasaqtaldy. Qazir qalada 145 471 úı bar. Áleýmettik osal topqa jatatyn 945 úı jeke topqa bólindi. Onyń ishinde 605 úı qatty otynmen jylytylady. Karantın engizilýine baılanysty TJD úıge profılaktıkalyq jumystar júrgizý tásilderin qaıta qarastyryp jatyr», - deıdi ol.

Sonymen qatar, ol byltyr jylý berý kezeńinde Almaty qalasynyń jeke turǵyn úı sektorynda 260 órt bolǵanyn, saldarynan 113 úı men 30 adam zardap shekkenin jetkizdi.

«Tamyz aıynan bastap TJD, Turǵyn úı saıasaty basqarmasy, «QazTransGazAımaq» AQ-y, aýdandyq ákimdikterdiń áleýmettik sala bólimderimen birge eriktilerdi tarta otyryp, 227 reıd júrgizildi, reıd barysynda 20 myńnan astam úıdi aralap shyqty. Bul rette, eń aldymen, turǵyndardyń áleýmettik osal toptarynyń (kópbalaly otbasylar, áleýmettik jaǵdaıy tómen, az qamtylǵan jáne mobıldi emes) úıler qamtyldy»,– dedi spıker.

Onyń aıtýynsha, jylý berý kezeńinde órtten jáne kómirtegi totyǵynan adamdardyń qaıtys bolý faktilerin azaıtý maqsatynda keshendi sharalar qolǵa alynǵan.