Jylyoı aýdanynda karantındik shekteýler jeńildetiletin boldy

NUR-SULTAN. QazAqparat - Jylyoı aýdanyndaǵy epıdemıologııalyq jaǵdaıdy tolyǵymen turaqtandyrý maqsatynda búginde karantındik shekteý sharalary saqtalyp tur, dep habarlaıdy Ortalyq kommýnıkatsııalar qyzmeti Atyraý oblystyq fılıalynyń baspasóz qyzmeti.

Sonymen qatar, Jylyoı aýdanynyń bas sanıtarlyq dárigeri Talǵat Habıbýllın karantındik sharalardy kezeń-kezeńimen jeńildetý týraly jańa qaýly qabyldady. Halyq pen bıznes ókilderi úshin mańyzdy nysandardyń jumys isteýi qajet.
Atap aıtqanda, 2020 jylǵy 10 maýsymda saǵat 07.00-den bastap ónerkásiptik kásiporyndardyń, iri qurylys dúkenderiniń, kólik, qoıma, aýylsharýashylyq servıstik kompanııalardyń qyzmetin jandandyrý josparlanýda.
Azyq-túlik bazarlarynyń, gıper-sýpermarketterdiń, iri azyq-túlik dúkenderiniń, saýda ortalyqtaryndaǵy azyq-túlik dúkenderiniń jumysyna ruqsat etiledi. Jumys ýaqyty 09.00-den 18.00-ge deıin.
Kóppáterli úılerde jáne turǵyndar kóp shoǵyrlanǵan aýdandarda ornalasqan dúkender saǵat 06.00-den 22.00-ge deıin jumys isteıdi.
Osy rette bas sanıtarlyq dáriger bul nysandardy ashýǵa tek kúsheıtilgen sanıtarlyq jaǵdaıda ǵana ruqsat etiletindigin atap ótti.
Qoǵamdyq tamaqtaný nysandarynyń da jetkizý qyzmeti saǵat 22:00-ge deıin uzartyldy.
HQKO bólimsheleri tek zańdy tulǵalarǵa qyzmet kórsetýge ruqsat etiledi.
Sondaı-aq, Jyloı aýdanynyń bas sanıtarlyq dárigeri Talǵat Habıýllın, joǵaryda atalǵan ruqsat berilgen uıymdardy qospaǵanda, qalǵan kásiporyndar shekteý sharalary kezinde óz jumystaryn toqtatý qajettigin jetkizdi.
«Eger epıdemıologııalyq jaǵdaı nasharlasa men tıisti sharalardy qabyldaıtyn bolamyn», - dedi Talǵat Habıbýllın.
Epıdemıologııalyq jaǵdaıdyń nasharlaýynyń aldyn-alý maqsatynda Jylyoı aýdanynda karantındik sharalardy jeńildetý kezeń-kezeńimen júzege asyrý josparlanýda.