Jylyna orta eseppen 500-600 baladan onkologııalyq dert anyqtalady

ASTANA. QazAqparat – Elimizde balalarǵa arnalǵan onkogematologııalyq kómek jetildirilip, 2024 jylǵa deıingi jol kartasy bekitildi. Bul týraly QR Densaýlyq saqtaý mınıstriniń orynbasary Vıacheslav Dýdnık málim etti, dep habarlaıdy QazAqparat tilshisi.

«Sońǵy 5 jyl ishinde gemopoetıkalyq diń jasýshalaryn transplantattaý boıynsha 335 balaǵa kómek kórsetildi. Onyń ishinde 49 bala atalǵan medıtsınalyq kómekti bıyl aldy. Memleket basshysynyń tapsyrmasy boıynsha bizdiń mınıstrlik onkologııalyq aýrýlarmen kúreske arnalǵan 2025 jylǵa deıingi keshendi jospardy ázirledi. Onyń ishinde balalarǵa arnalǵan onkologııalyq aýrýhanalardyń materıaldyq-tehnıkalyq bazasyn jetildirý qarastyrylǵan. Sonymen qatar dári-dármekpen qamtý jáne sala mamandarynyń biliktiligin jetildirý mindeti bar. Odan bólek, balalarǵa arnalǵan onkogematologııalyq ulttyq ortalyq qurý josparlanǵan», - dedi Vıacheslav Dýdnık OKQ-de ótken brıfıngide.

Sondaı-aq vıtse-mınıstr balalarǵa arnalǵan onkogematologııalyq kómek boıynsha 2024 jylǵa deıingi jol kartasynyń bekitilgenin aıtty.

«Jylyna orta eseppen 500-600 baladan onkologııalyq dert anyqtalady. Onyń 41%-y jedel leıkemııa, 14%-y ortalyq júıke júıesiniń isigi men 9%-y jumsaq tinderdiń sarkomalary jáne basqa da aýrýlar kezdesedi. Balalar arasynda 1-2 satydaǵy onkologııa dertiniń anyqtalýy 38%-dy quraıdy. Jas mólsherine kelsek, 33%-y 3 jastan 10 jasqa deıingi balalar. Onkologııalyq jáne gematologııalyq aýrýlary bar jylpy sany 3833 bala baqylaýda», - deıdi ol.