Jylyna 1 myńǵa jýyq adam ata-analyq quqyǵynan aıyrylady – ІІM

NUR-SULTAN. QazAqparat – Elimizde jyl saıyn 1 myńǵa jýyq ata-ana óz quqyqtarynan aıyrylady, odan bólek 40 myń ata-ana men zańdy ókil balalar quqyǵyn buzǵany úshin ákimshilik jazaǵa tartylady. QR Іshki ister mınıstriniń birinshi orynbasary Marat Qojaev OKQ-de ótken baspasóz máslıhatynda málim etti, dep habarlaıdy QazAqparat tilshisi.

«Jyl saıyn 40-tan astam ata-ana men zańdy ókilder kámelet jasyna tolmaǵan balalardyń quqyǵy men zańdy múddesin buzǵany úshin ákimshilik jazaǵa tartylady. Sol sekildi sot arqyly jyl saıyn 1 myńǵa jýyq adam ata-analyq quqyǵynan aıyrylady. Búgingi tańdaǵy balalar quqyǵyna qatysty basty problema – olarǵa qarsy zorlyq-zombylyq pen kúsh qoldanýdyń toqtamaýy. Osy jyldyń 8 aıynda kámelet jasyna tolmaǵan jasóspirimderge qatysty 589 qylmystyq is tirkeldi», - dedi Marat Qojaev.
Sondaı-aq, vıtse-mınıstr balalarǵa zorlyq kórsetýge qatysty qylmystyq jaýapkershilikti qataıtý baǵytyndaǵy zań jobasyn ázirleý qolǵa alynǵanyn aıtty.
«Qazirgi ýaqytta balalarǵa zorlyq-zombylyq kórsetken 1,5 myń adam túzeý mekemelerinde óz jazasyn ótep jatyr. Sonymen qatar, bala quqyǵyna qatysty taǵy bir másele - olardyń qaraýsyz qalýynan nemese bos ýaqytynyń kóp bolýynan túrli baǵyttaǵy oqys oqıǵaǵa tap bolýy. Bıyl 286 bala ajal qushty. Onyń 16-sy - órt saldarynan, 124-i sýǵa ketip qaıtys boldy jáne 146 bala jol-kólik apatynan mert boldy», - dedi ol óz sózinde.
Aıta keteıik, buǵan deıin M. Qojaev elordada óz balasyn uryp óltirgen áıelge qatysty sotaldy tergeý júrip jatqanyn málim etti. Odan bólek, mınıstrdiń orynbasary balalarǵa zorlyq-zombylyqty kóbinde kim jasaıtynyn aıtqan bolatyn.