Jylýsyz qalǵan ár páterdiń batareıasy jańalanady - Ekibastuz ákimdigi

ASTANA. QazAqparat – Ekibastuzdaǵy jylýsyz qalǵan ár páterdiń jylý batareıasy jańalanady. Óńirlik kommýnıkatsııalar qyzmetinde ótken brıfıngide Pavlodar oblysy ákiminiń mindetin ýaqytsha atqarýshy Oleg Krýk BAQ ókilderine osylaı jaýap berdi, habarlaıdy QazAqparat tilshisi.

Brıfıng barysynda jýrnalıster el arasynda jylýsyz qalǵan páterlerge jylý batareıasy jetpeı jatqany, sondyqtan ákimdik páterler arasynda jylý tasymaldaıtyn magıstral qubyrdy ǵana jańalaıtyny týraly áńgime taraǵanyn aıtty.

«Múldem shyndyqqa janaspaıdy. Ekibastuz turǵyndaryna búgingi tańda jylý batareıasy bárine jetetinin aıtqym keledi. Túsinikti bolý úshin aıtaıyn, búgin tańerteń 2500 batareıa ákelindi. Oǵan deıingi eki kúnde 850 batareıany aýystyrǵanbyz. Sondyqtan, isten shyqqan batareıalardyń keıbirin sol kúıi qaldyrý kerektigi týraly eshqandaı buıryq bolǵan joq. Bul aqylǵa qonbaıdy», - dedi Oleg Krýk.